Sumqayıtda fəaliyyət göstərən iki təhsil müəssisəsində boş qalan plan yerlərinin sayı açıqlanıb.
Bu barədə 2025-ci ilə aid tələbə qəbulu və ümumi təhsil müəssisələri üzrə buraxılış imtahanlarının nəticələrinə dair elmi-statistik materialların yer aldığı “Abituriyent” jurnalının 12-ci nömrəsində məlumat verilib.
Statistikaya görə, Azərbaycan Milli Konservatoriyası nəzdində Sumqayıt Musiqi Kolleci ölkə üzrə ən çox boş plan yeri qalan kolleclər sırasında ikinci yerdə qərarlaşıb. Kollecə ayrılan 115 plan yerindən 51-i boş qalıb, bu da 44,35 faiz təşkil edir.
Bunun əksinə olaraq, Sumqayıt Dövlət Universitetinin nəzdində Sumqayıt Dövlət Texniki Kollecində vəziyyət fərqlidir. Təhsil müəssisəsinə ayrılan 194 plan yerindən cəmi 2-si boş qalıb. Beləliklə, boş qalan yerlərin payı 1,03 faiz olub ki, bu da ölkə üzrə ən aşağı göstəricilərdən biridir.
Qeyd edək ki, ümumilikdə ölkə üzrə kolleclərə ayrılmış 8144 plan yerindən 677-si boş qalıb. Bu isə ümumi plan yerlərinin 8,31 faizini təşkil edir.
