Son günlər Bakıda balıq məhsullarına təlabat artıb. Alıcılar əsasən Farel, Xanı, Sazan, Beluqa, Ağ amur, Kütüm və s balıqlara daha çox üstünlük verir. Qızıl balıq alanların sayında artım var.
Paytaxtın 3-cü mikrorayon ərazisində yerləşən Keşlə Balıq Bazarında balıq satışı üzrə fəaliyyət göstərən mütəxəssis Ölkə.Az-a bildirir ki, xarici balıqlarla yanaşı yerli balıqlara da təlabat var: “Ət məhsullarının bahalaşması balığa olan təalabatı artıb. Son günlər 30-40 faiz təlabatda artım müşhaidə olunur. Gündəlik olaraq ən çox farel balığı satılır. Farel balığı 11-13 manat arasında dəyişir.
Bəs təzə balığı necə tanıyaq?
Ölkə.Az bildirir ki, təzə balığın dərisinin səthi təmiz, sərt və parlaq olmalı, az miqdarda şəffaf selik ilə örtülməlidir. Eyni zamanda pulcuqları hamar və parlaq, dərisi isə ətinə möhkəm yapışmış olmalı, quyruğu sallanmamalıdır. Köhnə balıq əti isə yumşaq təbəqəyə malik olur. Təzə balığa barmaqla əl vurduqda ət əvvəlki vəziyyətini yenidən alır, köhnə balıqda isə barmaq izi qalır. Bu üsul balığın təzəliyini yoxlamaq üçün ən asan yoldur. Bundan başqa balığı dik saxlayaraq duruşuna da fikir vermək lazımdır. Təzə balığın quyruq hissəsi dik, köhnə balıqda isə sallaq olur. Təzə balığın qanı açıq qırmızı rəngli və iysiz , köhnə balıqda isə qaraya çalan rəngdə və pis qoxulu olur.
Balığın gözlərindən də ətin təzə olmasını ayırd etmək mümkündür. Təzə balığın gözü aydın, şəffaf, dolu və göz bəbəyi parlaq, köhnə balığın gözləri isə çökük, göz bəbəyi mat olur. Təzə balığın qəlsəməsi tünd qırmızıya, köhnə balıqda isə boz rəngə çalır. Əzələsi bərk, elastik olub, sümükdən çətinliklə ayrılır.
Mütəxəssislər bildirir ki, balığı yoxlamaq üçün əlinizi balığın üzərində gəzdirin, pullar əlinizə gəlir, lakin tökülmürsə, deməli balıq təzədir Təzə balıqda qəlsəmələrin üzərindəki selik qat şəffaf və rəngsiz olur, köhnə balıqda isə selik şəffaflığını itirərək ağ, sarı, boz və s. rənglərə çevrilə bilər. Təzə balıqların orqanları dağılmamış, əzələləri möhkəm və gərgin, köhnə balıqların orqanları isə bulanıq rəngdə və asanlıqla bir-birindən ayrıla bilən vəziyyətdə olur.
