Azərbaycanın ümumi təhsil müəssisələrinin 2026-2027-ci tədris ili üçün tədris planları təsdiqlənib.
Gündəm24.az xəbər verir ki, bu barədə elm və təhsil naziri Emin Əmrullayev müvafiq əmr imzalayıb.
Əmrə əsasən, dövlət ümumi təhsil müəssisələrində yaradılan məktəbəhazırlıq qrupları, tədris Azərbaycan dilində və digər dillərdə aparılan I-XI siniflər, eləcə də azsaylı xalqların dillərinin öyrədildiyi siniflər üçün tədris planları təsdiqlənib.
Sənədlə uzun müddət təhsildən kənarda qalmış şəxslərin ümumi təhsil müəssisələrində təşkil olunan fərdi təhsili üçün də tədris planları müəyyənləşdirilib.
Bundan əlavə, “Bakı şəhəri “Vətən” idman liseyi”, “Bakı şəhəri 1 nömrəli idman liseyi” və “Gəncə şəhəri idman liseyi”ndə ümumtəhsil fənlərinin tədrisinin təsdiq olunmuş planlara uyğun təşkili nəzərdə tutulub.
Əmrə əsasən, Naxçıvan Muxtar Respublikası Təhsil Nazirliyi və Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyi ümumi təhsil müəssisələrinin fəaliyyətinin müvafiq tədris planları əsasında təşkilinə nəzarət edəcək.
Əmrin icrasına nəzarət elm və təhsil nazirinin müavini Həsən Həsənliyə həvalə olunub.
