27 sentyabr – Azərbaycanın müasir tarixinin ən mühüm və taleyüklü səhifələrindən birinin başlanğıcıdır. 2020-ci ilin bu günündə başlayan Vətən müharibəsi 44 gün ərzində xalqımızın illər boyu gözlədiyi Zəfərlə nəticələndi. Azərbaycan Ordusunun şücaəti, hərbçilərimizin qəhrəmanlığı, şəhidlərimizin canı, qazilərimizin sağlamlığı bahasına ərazi bütövlüyümüzün bərpası istiqamətində tarixi dönüş baş verdi.
Bu tarix Azərbaycan xalqının yaddaşında həm böyük qürur, həm də ağır itkilərin hüznü ilə yaşayır. Vətən müharibəsi təkcə döyüş meydanında qazanılmış hərbi qələbə deyil, həm də uzun illər doğma torpaqlarından ayrı düşmüş insanların qayıdış ümidlərinin gerçəyə çevrilməsi oldu. İşğaldan azad edilən ərazilərdə illər ərzində dağıdılmış şəhər və kəndlərin, tarixi-mədəni irs nümunələrinin, dini abidələrin və təbiətin məruz qaldığı zərərin aradan qaldırılması istiqamətində genişmiqyaslı işlər həyata keçirilir. Yeni yolların, yaşayış məntəqələrinin, məktəblərin, xəstəxanaların və digər sosial obyektlərin inşası ilə Qarabağ və Şərqi Zəngəzur yenidən qurulur. “Böyük Qayıdış” proqramı çərçivəsində isə keçmiş məcburi köçkünlərin illər sonra doğma yurdlarına qayıdışı davam edir. Bu gün həmin torpaqlara səfər edən insanlar vaxtilə yalnız xatirələrdə yaşatdıqları şəhər və kəndləri yenidən görür, illər əvvəl ayrıldıqları yurdlarının dəyişməsinə şahidlik edirlər. Lakin bu torpaqları işğal illərində deyil, müharibənin ən ağır günlərində görənlər üçün Qarabağdakı bugünkü mənzərənin xüsusi mənası var. Səngərdən, döyüş meydanından keçərək torpaqların azadlığı uğrunda mübarizə aparan Vətən müharibəsi iştirakçıları üçün bu dəyişiklik yalnız quruculuq prosesi deyil, həm də uğrunda mübarizə apardıqları Zəfərin real nəticəsidir.
Bəs 27 sentyabr yaxınlaşdıqca Vətən müharibəsinin iştirakçıları hansı hissləri keçirirlər? Döyüş günlərində işğal altında olan torpaqlarımızı hansı vəziyyətdə görüblər? Bu gün həmin ərazilərdə aparılan bərpa və quruculuq işləri, insanların öz yurdlarına qayıdışı onlarda hansı duyğuları yaradır?
Vətən müharibəsinin iştirakçısı, qazi Natiq Mehdiyev Musavat.com-a açıqlamasında bu suallara cavab verib, müharibə günlərindən, Qarabağın azadlığı uğrunda gedən döyüşlərdən və bu gün həmin torpaqlarda baş verən dəyişikliklərdən danışıb.
Qeyd edək ki, Vətən müharibəsinin iştirakçısı, qazi Natiq Vəli oğlu Mehdiyev 10 il Xüsusi Təyinatlı Qüvvələrdə xidmət edib. 2020-ci il Vətən müharibəsi zamanı Tərtər-Qapanlı istiqamətində gedən döyüş tapşırığında ağır yaralanıb. Hazırda II qrup, ömürlük əlilliyi var. Qazimiz III dərəcəli “Qüsursuz xidmətə görə” medalı, həmçinin 90, 95 və 100 illik medallarla təltif olunub.
27 sentyabr yaxınlaşdıqca keçirdiyi hisslərdən danışan Natiq Mehdiyev bildirib ki, Vətən müharibəsinin başlanması Azərbaycan xalqında fərqli hiss yaradıb:
“Biz yeganə xalqıq ki, müharibənin başlanmasına sevinirik, qurtarmasına yox. 6-7 il bundan əvvəl bütün dövlət tədbirlərində, çıxışlarımızda ilk sözümüz bu olurdu: “İnşallah, Qarabağda, inşallah, Qarabağda…” Şükür Allaha, artıq onu demirik. Bu gün Qarabağımız artıq bizdədir və əvvəlkindən də yaxşı, güllü-çiçəkli vəziyyətdədir”.
Qazi vurğulayıb ki, bu gün Qarabağa əvvəlki kimi döyüş, səngər və təhlükə şəraitində deyil, Zəfər yolu ilə rahat şəkildə getmək mümkündür. Onun sözlərinə görə, bu gün insanlar öz avtomobilləri və digər nəqliyyat vasitələri ilə Qarabağa gedir, doğma torpaqları həm özləri, həm də övladları ilə ziyarət edirlər:
“Qarabağa Zəfər yolu ilə, rahat şəkildə öz nəqliyyat vasitələrimizlə gedirik. Şəhidlərimizin, qazilərimizin bizə bəxş etdiyi Zəfər yolu ilə artıq rahat gedib öz Qarabağımızı həm özümüz, həm də övladlarımızla ziyarət edirik”.
Qazi Vətən müharibəsində iştirak edən, şəhid olan və yaralanan hərbçilərlə fəxr etdiyini bildirib:
“Şəhidlər Azərbaycanın qürur mənbəyi, qazilər isə Vətən qarşısında xidmət göstərmiş insanlardır. Başda Ali Baş Komandanımız olmaqla, əsgərlərimizlə, şəhidlərimizlə, qazilərimizlə hər birimiz qürur duyuruq, fəxr edirik. Şəhidlər bizim başımızın tacıdır. Onlar bizim qürur mənbəyimizdir. Qazilərimiz də onlar kimi. Qarabağı bizə qaytardıqları üçün onlara borcluyuq”.
