“Mövsüm dəyişdikcə xəngələ, düşbərəyə və digər xəmir yeməklərə tələbat duyulur. Burada təbii ki, havaların soyuması ilə orqanizmin bu enerji ehtiyacını ödəməsi məsələsi var”.
Bu fikirləri Redaktor.az-a qida eksperti İlkin Şirinov havaların soyuması ilə xəngəl, düşbərə və s. xəmir yeməklərə üstünlük verilməsinin yarada biləcəyi mənfi təsirlərdən danışarkən bildirdi.
Onun sözlərinə görə, xəmir yeməkləri sanki insanın bədənini isidir:
“Hardasa bu insanların psixologiyasında belədir. Amma burada nəzərə almaq lazımdır ki, xəngəl, düşbərə və bu kimi xəmir yeməkləri dadlı, enerji baxımından zəngindir. Amma tez-tez yeyildikdə bədənə müəyyən ziyanları ola bilər. Artıq çəki, piylənmə yarana bilər. Bu yeməklər çoxlu unla və yağla hazırlanır, enerji dəyəri yüksəkdir, hərəkətsiz həyat tərzi ilə birlikdə artıq çəkiyə səbəb ola bilir. Xəmirin əsas tərkibi ağ undur. Ağ un da tez həzm olunur və qanda şəkərin səviyyəsini sürətlə qaldırır. Bu da insulin dirənci, diabet riskini artıra bilir”.
Ekspert qeyd etdi ki, xəmir xörəkləri ürək-damar riski olanlarda qanda pis xolesterolun səviyyəsini qaldırmağa, artırmağa gətirib çıxara bilir.
“Xəngəl, düşbərə bəzən çox yağlı ətlə və kərə yağı ilə hazırlanır. Bu da bədəndə, təbii ki, pis xolesterolu artırır və bu baxımdan müəyyən mənada təhlükəli sayıla bilir.
Bu yeməklərin ev və restoran şəraitində hazırlanması da əsas məsələlərdəndir. Burada xəngəlin hansı ətdən hazırlanması, mənşəyinin məlum olub-olmaması məsələsi var. Bunlar hansı ətlərdən hazırlanır? Hazırlanma qaydası necədir? Onun tərkibinə vurulan ədviyyatlar hansı səviyyədədir? Təbii ki, bunlar sual yaradır.
Bəzən müxtəlif sosial şəbəkələrdə bu cür yeməkləri reklam edirlər. Təbii, bu da çox geniş yayılmış bir marketinq üsuludur. Soyuq havalarda insanların isti, doyurucu, ətirli yeməklər görəndə iştahının açılması məsələsi var. Ona görə də müxtəlif sosial şəbəkələrdə, müxtəlif sosial platformalarda bu cür yeməkləri reklam formasına salmaqla sanki insanları ora cəlb etməyə çalışırlar. Bu reklamlar da dad-görüntü üzərində qurulur. Lakin sağlamlıq tərəfi demək olar ki, nəzərə alınmır. Yəni sosial şəbəkələrdə paylaşılan o videolar insanda “indi bunu mən yeməliyəm” hissi yaradır”, – deyə İlkin Şirinov vurğuladı.
