Qol və ayaqların keyiməsi bəzən sinirlərin müvəqqəti sıxılması ilə bağlı olsa da, bəzi hallarda ciddi xəstəliklərin əlaməti ola bilər.
Gündəm24.az xəbər verir ki, nevroloq və osteopat Anton keyimənin səbəblərini və hansı hallarda təhlükəli sayıldığını izah edib.
Mütəxəssisin sözlərinə görə, uzun müddət eyni vəziyyətdə oturmaq və ya narahat vəziyyətdə yatmaq sinirlərin müvəqqəti sıxılmasına səbəb ola bilər. Bədən mövqeyi dəyişdikdən sonra hissiyyat tez bərpa olunursa, bu, adətən narahatlıq doğurmur.
Lakin qolun, ayağın, üzün yarısının və ya bədənin qəfil keyiməsi təhlükəli əlamət ola bilər. Bu hal əzələ zəifliyi və başgicəllənmə ilə müşayiət olunarsa, dərhal təcili yardım çağırmaq lazımdır. Belə simptomlar insultdan xəbər verə bilər.
Həkim bildirib ki, şəkərli diabet də periferik sinirlərə təsir göstərərək əl və ayaqlarda hissiyyat itkisinə səbəb ola bilər.
Keyimə uzun müddət davam edirsə və ya mütəmadi təkrarlanırsa, həkimə müraciət etmək tövsiyə olunur.\News24.az
