“Azərbaycan Respublikasının Vergi Məcəlləsində dəyişiklik edilməsi zərurəti yaranıb. Həmin qanun layihələrində nəzərdə tutulan vergi azadolmalarına dair müvafiq icra hakimiyyəti orqanının müəyyən etdiyi qurum tərəfindən hazırlanan qiymətləndirilmə arayışı cari ilin may ayının 1-dək müvafiq icra hakimiyyəti orqanına təqdim edilməlidir. Həmin orqan isə bu sənədləri Azərbaycan Respublikasının Milli Məclisinə may ayının 15-dən gec olmayaraq göndərməlidir. Mənə deyilənə görə, bu məsələlər əvvəlki illərdə də qaldırılıb. Əgər doğrudan da Vergi Məcəlləsinin bu tələbinə əməl etmək mümkün deyilsə, Vergi Məcəlləsindən ölü normanı çıxartmaq lazımdır”.
Gündəm24.az Globalinfo.az-a istinadən xəbər verir ki, bu fikirləri Milli Məclisin deputatı Qüdrət Həsənquliyev deyib.
“Azərbaycanda ərzağın qiyməti artıb. Keyfiyyətli ət əhalinin yoxsul kəsimi üçün əlçatmaz olub. Bu kimi hallar cinayətkarlığın da artmasına səbəb olub. Bir çox insanlar dolanışığını təmin etmək üçün riskə gedir və cinayətə meyllənirlər. Buna görə də hesab edirəm ki, aşağı gəlirli əhali üçün vergi güzəştləri daha da genişləndirilməlidir.
Bu ildən etibarən 2500 manatadək gəliri olan şəxslər üçün güzəştlər tətbiq edilib və onların vergi dərəcəsi 3 faiz olaraq müəyyən edilib. Mən hesab edirəm ki, 1000 manatadək maaş alan şəxslər ümumiyyətlə bütün növ vergilərdən azad olunmalıdır.
Qeyd edilsin ki:
– 1000 manatdan 2 500 manatadək gəliri olan şəxslər üçün vergi dərəcəsi 3 faiz olsun.
– 2500 manatdan yuxarı gəlirlər üçün isə mövcud qayda tətbiq edilsin”, – Q.Həsənquliyev bildirib.
