Əmək və əhalinin sosial müdafiəsi naziri Anar Əliyevin pensiyalarla bağlı çıxışı diqqət çəkib. O, Milli Məclisin 20 noyabrda keçirilən plenar iclasında deyib ki, 2026-cı il üzrə əmək pensiyalarının maliyyələşdirilməsi üçün ayrılan vəsait ötən illə müqayisədə 782,4 milyon manat və ya 10,9 faiz artımla nəzərdə tutulub.
Sitat: “Bunun 81,2 faizi və ya 635,6 milyon manatı indeksasiya xərclərinin, digər hissəsi isə yeni təyin olunan və yenidən hesablanan pensiyaların məbləğlərinin maliyyələşdiriməsi ilə bağlı xərclərin payına düşür. 2026-cı il üzrə indeksasiyanın təqribən 9,2 faiz səviyyəsində olması, orta pensiyanın məbləğinin isə yenə də 9,2 faiz artaraq 590 manata, yaşa görə pensiyanın məbləğinin isə 629 manata çatması proqnozlaşdırılır”.
Bu artım hazırkı bahalaşma və inflyasiya fonunda pensiyaçaların həyatına hansı müsbət təsir göstərəcək? Bahalıq pensiyalara edilən artıma təsir edə bilərmi?
Globalinfo.az-a danışan iqtisadçı Asif İbrahimovun sözlərinə görə, nazirin açıqladığı rəqəmlərə əsasən pensiyalar təqribən 9,2-9,3 faiz həcmində artırılacaq:
“Lakin məlumdur ki, pensiyaçıların ən çox istifadə etdiyi xidmətlərdən biri xüsusilə nəqliyyatdır və burada qiymətlər ən azı 20-30 faizdən çox bahalaşıb. Eyni vəziyyət dərman vasitələri ilə bağlı da müşahidə olunur. Orta statistik Azərbaycan vətəndaşı real bahalaşmanı görür və aydın olur ki, faktiki inflyasiya indeksi iki rəqəmli səviyyədədir, yəni ən azı 12-15 faiz civarında, hətta daha çoxdur. Belə olan halda, pensiyaların 9,2 faiz indeksasiyası yalnız kağız üzərində artımı göstərir”.
Asif İbrahimov
İqtisadçı qeyd edib ki, kağız üzərində hesablanan inflyasiya ilə müəyyən uyğunluq yaransa belə, bu, hazırkı real şəraitə adekvat deyil:
“Yəni Azərbaycanda yaşayan bir çox pensiyaçı çətinliklə üzləşəcək. Pensiyaçıların əsas xərcləri dərmanlar, kommunal xidmətlər və ərzaq məhsulları – çörək, ət və digər gündəlik tələbat mallarıdır. Bu kateqoriyaların hər birində 9,2 faiz deyil, daha yüksək bahalaşma müşahidə olunur. Buna görə də 9,2 faizlik indeksasiya gerçək durumu əks etdirmir”.
