“Keytrinq xidmətlərində müşahidə olunan problemlər uzun illər ərzində yığılıb qalmış sistem boşluqlarının nəticəsidir. Əsas çətinliklər istilik və soyuq zəncirin pozulması, sanitar qaydaların düzgün tətbiq olunmaması və nəzarətin zəif olması ilə bağlıdır. Keytrinq müəssisələrində HACCP proqramının formal yox, real tətbiqi və məhsullara davamlı nəzarət təmin edilməlidir”.
Gündəm24.az Demokrat.az–a istinadən xəbər verir ki, bunu qida eksperti İlkin Şirinov deyib.
O bildirib ki, HACCP proqramı keytrinq xidmətlərində qida hazırlığı və paylanması proseslərini izləmək üçün istifadə olunur:
“Bu proqram müəssisənin fəaliyyətini dövr boyu izləməyə, bütün qida əməliyyatlarını nəzarətdə saxlamağa və məhsulların istehsalı ilə satışında problemlərin qarşısını almağa imkan verir. İstilik və soyuq zəncirlər, temperatur göstəricilərinə nəzarət və xəbərdarlıq sistemləri proqramın vacib hissələridir”.
Ekspert qeyd edib ki, sanitar normativlər və etiket məsələləri də keytrinq xidmətlərində önəmlidir:
“Məhsulların tərkibi, qatqılar, istehsal və son istifadə tarixləri aydın göstərilməli, müştəri yanlış məlumatlandırılmamalıdır. Bu məqsədlə sertifikatlar, təlim prosesləri və mütəmadi monitoringlər məcburi olmalıdır”.
Onun sözlərinə görə, hər bir keytrinq müəssisəsində daxili nəzarət mexanizmi olmalıdır:
“Daxili nəzarət yoxdursa, səhvlər və pozuntular aradan qaldırıla bilməz. Mütəmadi monitoringlərin təşkili həm müəssisələrdə, həm də aidiyyəti qurumlar tərəfindən həyata keçirilməlidir ki, qida təhlükəsizliyi təmin olunsun və müştərilərin sağlamlığı qorunsun”.
Qeyd edək ki, 2025-ci ilin yanvar-sentyabr aylarında AQTA-nın yoxlamalarında bəzi keytrinq şirkətlərinin qida təhlükəsizliyi tələblərinə əməl etmədiyi müəyyən edilib.
