Bakıda 29 nömrəli marşrut üzrə hərəkət edən avtobusda təhlükəli anlar yaşanıb. Sərnişin sıxlığı səbəbindən nəqliyyat vasitəsinin qapısının texniki detalı qopub və avtobus bir müddət qapısı açıq halda yoluna davam edib.
Gündəm24.az xəbər verir ki, bu barədə görüntüləri hadisə şahidi sərnişinlərdən biri Bakupost.az-a göndərib.
Şikayətçinin sözlərinə görə, həmin marşrutda tez-tez sıxlıq, mübahisə və sürücü ilə sərnişinlər arasında gərginliklər yaşanır. O bildirib ki, yer çatışmazlığı səbəbindən insanlar bəzən 20-30 dəqiqə soyuqda növbəti avtobusu gözləməli olurlar:
“Mən hər gün bu marşrutdan istifadə edirəm. 29 nömrəli avtobusda demək olar ki, hər gün hamı bir-birini, sürücünü söyür. Yer olmur, insanlar küçədə dayanıb uzun müddət gözləyirlər. Biz sürücülərə irad bildirəndə deyirlər ki, avtobuslar azdır, bir-ikisi də xarabdır. Hətta bu gün avtobus o qədər dolu idi ki, artıq qapının detalı qopdu. Biz bir müddət açıq qapı ilə yol getdik. Bu nə dərəcədə düzgündür? Orada hadisə baş verə, kimsə yerə yıxıla bilərdi. Çox biabırçı vəziyyətdir. Xahiş edirik, bu avtobusları dəyişsinlər ki, insanlar işə-evə normal gedib-gələ bilsinlər. Avtobuslar balacadır, sərnişinlər isə çoxdur”.
Sərnişinin dediyinə görə, dəfələrlə aidiyyatı qurumlara şikayət etsələr də, nəticəsi olmur:
“Köhnə avtobuslardır, qara tüstüsü, texniki problemləri çoxdur. Hər kəs də şikayət edir. 4-5 ildir hər yerə müraciət edirik, baxılmır. Üstəlik, bu xətt istiqamətində başqa avtobus olmadığına görə insanlar məcburdur ki, 29 nömrəli avtobusla getsinlər. 29 da öz işini düzgün qurmur. İşdən çıxıb evə gedən vaxt vəziyyət çox biabırçı olur”.
Məsələ ilə bağlı AYNA-ya sorğu göndərilib.
