Xətai rayonu, Əhmədli qəsəbəsində yerləşən 171 nömrəli məktəbdə təhsil alan şagirdlərin valideynləri ciddi narahatlıq keçirirlər.
Valideynlər bu barədə Musavat.com-a müraciət edərək bildiriblər ki, məktəbin ətrafı sahibsiz küçə itləri ilə doludur və bu vəziyyət uşaqların təhlükəsizliyini risk altına salır.
Onların sözlərinə görə, şagirdlər tez-tez küçə itlərinin hücumu ilə üzləşir, bəzən isə qorxudan yollarını dəyişmək məcburiyyətində qalırlar:
“Ötən gün övladım dərsdən axşam çıxanda evə gec gəlmişdi. Onu qarşılamağa getdim. Məlum oldu ki, uşaqlar itlərdən qorxduqları üçün yolu dəyişərək dolayısı ilə gəliblər. Xüsusilə axşam saatlarında çox narahat oluruq. Sabah bu itlər uşaqlara hücum etsə, kim cavab verəcək?”
Valideynlər qeyd edirlər ki, bir müddət əvvəl aidiyyəti qurumların nümayəndələri əraziyə gələrək itləri toplasa da, bəzi sakinlərin etirazı ilə bu proses yarımçıq qalıb:
“Bəzi sakinlər itləri yedizdirdiklərini deyərək onların aparılmasına qarşı çıxdılar. Nəticədə itlərin sayı gündən-günə artır. Artıq təkcə uşaqlar deyil, böyüklər də bu vəziyyətdən ehtiyat edir. Dəfələrlə hücum halları olub. Sonuncu dəfə uşaqların üzərinə cumanda ətrafdakı insanlar müdaxilə edib onları xilas etdilər. Ən təhlükəli vaxt isə axşam saatlarıdır”.
Məsələ ilə bağlı Xətai Rayon İcra Hakimiyyəti başçısı aparatının şöbə müdiri Pənah İmanov Musavat.com-a açıqlamasında problemin onlara dəfələrlə bildirildiyini təsdiqləyib:
“Bu məsələ ilə bağlı bizə mütəmadi müraciətlər daxil olur, qəbullarda da vətəndaşlar problemi qaldırırlar. Lakin məsələ hələ də həllini tapmayıb və çətin vəziyyət olaraq qalır. Bakı Şəhər İcra Hakimiyyətindən müvafiq tapşırıq gözləyirik. Çünki bu problemi rayon səviyyəsində tam həll etmək mümkün deyil. Əvvəllər “Toplan” Sahibsiz Heyvanlara Qayğı Mərkəzinin əməkdaşları gəlib itləri toplayırdılar. Hazırda isə belə bir praktika müşahidə olunmur. Biz də aidiyyəti qurumlara müraciət etmişik”.
Qeyd edək ki, məktəb ətrafında yaranmış vəziyyət valideynləri ciddi şəkildə narahat edir və onlar problemin təcili həllini tələb edirlər.
