Dekabrın 12-də Rusiya ordusunun Ukraynanın Odessa limanında lövbər salmış Türkiyəyə məxsus “Cenk Roro” adlı yük gəmisini vurması narazılıqla qarşılanıb.
Bundan öncə Rusiyaya məxsus gəmi də Qara dənizdə Ukrayna tərəfindən vurulmuşdu. Türkiyə gəmisinə hücumun Prezident Rəcəb Tayyib Ərdoğanla Rusiya lideri Vladimir Putin arasında Türkmənistanda keçirilən ikitərəfli görüşdən sonra baş verməsi diqqət çəkir.
Bu hadisə iki ölkə arasında gərginliyə səbəb ola bilərmi?
Gündəm24.az Globalinfo.az-a istinadən xəbər verir ki, politoloq Züriyə Qarayeva deyib ki, Rusiyanın Türkiyəyə məxsus gəmiyə “İsgəndər”lə zərbə endirməsi Moskva–Ankara xəttində ciddi gərginlik yarada biləcək hadisədir:
“Hücumun təsadüf olub-olmaması belə, Türkiyənin NATO üzvü olması fonunda situasiyanı daha həssas edir. Ankara üçün bu, yalnız iqtisadi və təhlükəsizlik deyil, həm də regional nüfuz məsələsidir. Rusiya tərəfi hadisəni səhv atış və ya texniki xəta kimi qələmə verib məsuliyyəti yumşaltmağa çalışa bilər, lakin belə bir durumda Türkiyənin açıq şəkildə üzr və izahat tələb etməsi gözləniləndir. Çünki Moskvanın hərbi əməliyyat zonasına yaxın ərazilərdə həyata keçirdiyi addımlar artıq Qara dəniz təhlükəsizliyinin bütövlüyünə toxunur və bu, Türkiyənin qəbul edə biləcəyi risk deyil.
Züriyə Qarayeva
Aşqabadda keçirilən 1,5 saatlıq görüşün məhz bu hadisənin baş verdiyi vaxtlara təsadüf etməsi diqqətçəkən məqamdır. Rəsmi məlumatlarda insidentdən birbaşa bəhs olunmasa da, iki liderin regional təhlükəsizlik məsələlərini müzakirə etdiyi bildirilir ki, bu kontekstdə gəmi hadisəsinin də bağlı qapılar arxasında gündəmə gəlməsi ehtimalı çox yüksəkdir. Ərdoğanın son aylarda Moskva ilə münasibətlərin balanslaşdırılmasına xüsusi önəm verməsi, Putinin isə Qara dənizdə yeni eskalasiya istəməməsi fonunda tərəflərin bu insidenti nəzarət altına almağa çalışdığı görünür. Lakin əgər hadisə təkrarlanar və ya Rusiya məsuliyyəti qəbul etməzsə, Ankara daha sərt ritorika və beynəlxalq platformalarda məsələnin qaldırılması strategiyasına keçə bilər”.
