Xəbər verdiyimiz kimi, bu gün Azərbaycan Xalq Partiyasının (AXP) VII növbədənkənar qurultayı keçirilib. Partiyanın sədri Pənah Hüseyn bildirib ki, qurultay onun istefasını qəbul edib və Sadıqov Qiyas Böyükağa oğlu AXP-nin yeni sədri seçilib.
“Qurultay mənim istefamı qəbul etdi. Sadıqov Qiyas Böyükağa oğlu AXP sədri seçildi. Uğurlar!”, – deyə P.Hüseyn qeyd edib.
Gündəm24.az Globalinfo.az-a istinadən xəbər verir ki, Pənah Hüseyn bu prosesin əvvəlcədən planlaşdırıldığını bildirib:
“Qurultay mənim tərəfimdən çağırılıb. Təxminən bir il əvvəl bu mövzu gündəmdə idi. İyul ayından etibarən sədrlik səlahiyyətlərimi müavinə həvalə etmişdim.
Bu gün isə bir neçə aydır aparılan hazırlıqların nəticəsi olaraq qurultay baş tutdu və müvafiq təşkilati qərarlar qəbul edildi”.
Pənah Hüseyn istefasının əsas səbəblərini də açıqlayıb:
“Bir il öncə yeni sədrin seçilməsi məsələsini qaldırmışdım. Çünki sonuncu Milli Məclis seçkilərində Xalq Partiyasının mövqeyi ciddi müzakirə mövzusuna çevrilmişdi. Bu istiqamətdə formalaşan ictimai-siyasi vəziyyət hər kəsə məlumdur. Partiya Parlamentdə təmsil olunmadı.
Ümumilikdə, 2019–2020-ci illərdən etibarən davam edən proseslərin nəticələri gözləntilərimizə uyğun olmadı. Həmin proseslərin iştirakçılarından biri də mən olmuşam. Partiya və cəmiyyət daxilində bu proseslərin ölkə üçün ciddi dəyişikliklərə səbəb olacağını əsaslandıran və təbliğ edən şəxslərdən biri də mən idim. Bu baş vermədiyi üçün məsuliyyəti üzərimə götürərək belə bir qərar verdim.
Hesab edirəm ki, mövcud şəraitdə partiya sədrinin yenilənməsi təşkilat üçün daha faydalı ola bilər. Lakin mən partiyadan və siyasətdən getmirəm. Partiyanın İdarə Heyətinin üzvü olaraq fəaliyyətimi davam etdirəcəyəm”.
