4 dekabr 2025-ci il tarixində Azərbaycan Milli İncəsənət Muzeyinin Səttar Bəhlulzadə zalında Azərbaycan təsviri sənətinin görkəmli nümayəndəsi, realist dəzgah rəngkarlığının banisi Mirzə Qədim İrəvaninin 200 illik yubileyinə həsr olunan möhtəşəm tədbir keçirilib.
Yubiley çərçivəsində “Mirzə Qədim İrəvani: Zamanların qovşağında” kitabının təqdimatı və “Mirzə Qədim İrəvani: 200 illik sənət salnaməsi” adlı sərginin açılış mərasimi baş tutub.
Tədbirdə dövlət qurumlarının rəhbər şəxsləri, millət vəkilləri, tanınmış rəssamlar, sənətşünaslar, eləcə də mədəniyyət və ictimaiyyət xadimləri iştirak ediblər.
Mərasim zalda bərqərar olmuş xüsusi atmosferlə — rəssamın məşhur “Bülbül və qızılgül” kompozisiyasının müasir interpretasiyası, bülbül səsi və gül ətrinin müşayiəti ilə başlayıb.
Tədbiri ilk olaraq Azərbaycan Respublikasının mədəniyyət naziri Adil Kərimli çıxış sözü ilə açaraq Azərbaycan təsviri sənət tarixində Mirzə Qədim İrəvaninin xüsusi yerini vurğulayıb.
Daha sonra Azərbaycan Milli İncəsənət Muzeyinin direktoru Şirin Məlikova, Qərbi Azərbaycan İcmasının İdarə Heyətinin sədri, millət vəkili Əziz Ələkbərli, Azərbaycan Rəssamlar İttifaqının sədri, Xalq rəssamı Fərhad Xəlilov, Gürcüstan Milli Muzeyinin direktor müavini Mixeil (Muxai) Sereteli və kitabın müəllifi, sənətşünaslıq üzrə fəlsəfə doktoru, AMİM-in Elmi-tədqiqat şöbəsinin müdiri Telman İbrahimli rəssamın irsi və sərginin əhəmiyyəti barədə fikirlərini bölüşüblər.
Təqdim olunan “Mirzə Qədim İrəvani: Zamanların qovşağında” kitabı rəssamın həyatı, yaradıcılığı, dövrün mədəni mühiti və yeni elmi araşdırmaları əhatə edir. Kitab beş müəllifin — İrina Kaşaridze, Aytən Əhmədova, Şirin Məlikova, Nazim Mustafa və Telman İbrahimlinin birgə əməkdaşlığı nəticəsində ərsəyə gəlib.
Açılan sərgidə Mirzə Qədim İrəvaninin Azərbaycan və Gürcüstan muzeylərində qorunan gül və bülbül motivli əsərləri, “Fətəli şah”, “Qacar şahzadəsi Mah Tələt xanım”, “Qacar şahzadəsi Vəcihulla Mirzə” kimi məşhur portretləri, bədii tikmə və divar rəsmləri üçün hazırlanmış trafaretləri nümayiş olunur. Ekspozisiyanın ən diqqətçəkən hissələrindən biri vaxtilə İrəvanın memarlıq incisi sayılan Sərdar sarayının divarlarını bəzəmiş monumental rəngkarlıq nümunələrinin ekranda bərpası və təqdimatı olub.
Tədbirin sonunda “Cənnət yuxusu” bədii-sənədli filmi nümayiş etdirilib.
Qeyd edək ki, Mirzə Qədim İrəvani irsinin həm milli, həm də regional miqyasda yenidən dəyərləndirilməsi məqsədi daşıyan bu yubiley tədbiri Mirzə Qədim İrəvani irsinin geniş ictimai təqdimatı və sənət aləmində yenidən qiymətləndirilməsi baxımından xüsusi əhəmiyyət kəsb edir.
