“Ciddi yuxu rejimi hipertoniya riskini azaldır və oyandıqdan dərhal sonra bir stəkan su içmək ürək-damar sistemi və böyrəklərin fəaliyyətini yaxşılaşdıra bilər”.
Oxu.Az xəbər verir ki, bunu “Metropoles” nəşrinə müsahibəsində braziliyalı həkim Elpidio Franko deyib.
Həkimin sözlərinə görə, hər gün eyni vaxtda yatmaq və oyanmaq vərdişi qan təzyiqinin və ürək döyüntülərinin sabitləşməsinə, həmçinin yuxu və streslə əlaqəli hormonların tənzimlənməsinə kömək edir. Əksinə, bu cədvəlin pozulması ürək-damar sisteminə əlavə gərginlik yaradır.
E.Franko, həmçinin səhərə bir stəkan su içməklə başlamağı tövsiyə edir.
Ekspertin fikrincə, səhər yeməyi balanslı olmalıdır, çünki ilk yemək gün ərzində enerji səviyyəsini və konsentrasiyanı qoruyur. Mütəxəssis yağsız zülallara (qatıq, balıq, yumurta) və gec həzmolunan karbohidratlara (sıyıq, tam taxıllı çörək) üstünlük verməyi məsləhət görür.
Qısa səhər gəzintisi əlavə faydalar təqdim edir, bunun üçün vaxt yoxdursa, ən azı açıq pəncərənin yanında dayanıb təmiz havada nəfəs almaq tövsiyə olunur.
Nəhayət, yuxudan oyandıqdan dərhal sonra smartfondan istifadə etmək məsləhət görülmür: xəbərlərə və sosial mediaya erkən məruz qalmaq bədən tam oyanmamış beyni stimullarla həddən artıq yükləyir.
