Ermənistanın Baş naziri Nikol Paşinyan 10 üsyançı yepiskopla Erməni Apostol Kilsəsinin “təkmilləşdirilməsi üçün yol xəritəsi”ni imzalayıb.
Gündəm24.az Publika.az-a istinadən xəbər verir ki, daha əvvəl, 8 dekabrda Paşinyan “Ermənistan Apostol Kilsəsinin yenilənməsi” planını təqdim etmiş və bunu “yol xəritəsi” adlandırmışdı.
Paşinyan bu “yol xəritəsinin” Bütün Ermənilərin Katolikosu II Qareginin gedişindən sonra həyata keçiriləcəyini və hakimiyyətin bu addımı davamlı olaraq həyata keçirdiyini bildirmişdi. Bundan əlavə, hökumətin kilsə nizamnaməsinin hazırlanmasına kömək etməyə hazır olduğunu da qeyd etmişdi.
Bütün Ermənilərin Katolikosu II Qareginin istefasını tələb edən iyerarxlar baş nazirin iqamətgahına gələrək imzalarını atıblar.
Sənəddə aşağıdakı məqamlar yer alır:
İslahat proqramının ictimaiyyətə açıqlanması.
Kilsənin hazırkı rəhbərinin vəzifədən kənarlaşdırılması.
Patriarxal Taxtın Yerli Onluqlarının Seçkiləri.
Kilsə Nizamnaməsinin qəbul edilməsi.
Bütün Ermənilərin Katolikosunun Seçkiləri.
Qeyd etmək lazımdır ki, Ermənistan Konstitusiyasına görə, Erməni Apostol Kilsəsi dövlətdən ayrıdır və xüsusi missiyaya malikdir. Həm ruhanilər, həm də siyasətçilər dəfələrlə hökumətin Kilsənin işlərinə qarışmaq hüququ olmadığını bildiriblər.
