Xüsusi icra məmurları və onların köməkçiləri hər iki ildən bir icbari qaydada təlimlərə cəlb ediləcəklər.
Ajans.az-ın məlumatına görə, təlimlərin əsas məqsədi onların fəaliyyətinin səmərəliliyinin artırılması, nəzəri və praktiki biliklərinin təkmilləşdirilməsi, həmçinin peşəkar vərdişlərinin inkişaf etdirilməsidir.
Qaydalara görə, ixtisasartırma təlimləri icra icraatının aparılması xüsusiyyətləri, xüsusi icra məmurlarının fəaliyyətində tətbiq olunan qanunvericilik, məhkəmə qərarlarının icrası zamanı yaranan praktiki problemlər və onların həlli yolları kimi mövzuları əhatə edəcək. Təlim ehtiyacları fəaliyyətə nəzarətin nəticələri və Xüsusi İcra Məmurları Palatasının təklifləri əsasında müəyyən ediləcək.
Peşə hazırlığının artırılması üzrə təlimlər isə etik davranış qaydaları, idarəetmə bacarıqları, kargüzarlıq və arxiv işi, rəqəmsal bacarıqlar, elektron sistemlərdən istifadə, mühasibatlıq və ofis idarəçiliyi kimi istiqamətləri əhatə edəcək. Bununla yanaşı, fəaliyyətin xüsusiyyətlərinə uyğun digər praktiki sahələr üzrə də tədris proqramları təşkil oluna biləcək.
Təlimlərin illik planı Ədliyyə Akademiyası tərəfindən hazırlanacaq, Xüsusi İcra Məmurları Palatası ilə razılaşdırılacaq və Akademiyanın Elmi Şurası tərəfindən qəbul ediləcək. Təlim proqramlarının məzmunu və müddəti də Akademiya tərəfindən müəyyən olunacaq. İştirakçılar təlimin vaxtı və yeri barədə ən azı 10 gün əvvəl məlumatlandırılacaqlar.
Qərara əsasən, təlimlər ödənişli əsaslarla keçiriləcək və iştirakçılar yekunda qiymətləndirmədən keçəcəklər. Yalnız tədris proqramı üzrə nəzərdə tutulan dərslərin azı 80 faizində iştirak edən şəxslər yekun qiymətləndirməyə buraxılacaqlar. Qiymətləndirməni uğurla başa vuranlara isə beş iş günü ərzində müvafiq şəhadətnamə təqdim olunacaq.
Yeni qaydalarda təlimlərdə iştirakdan əsassız şəkildə yayınan xüsusi icra məmurlarına münasibətdə məsuliyyət tədbirləri də nəzərdə tutulub. Belə ki, üzrsüz səbəbdən təlimdə iştirak etməmək və ya iştirakdan yayınmaq intizam pozuntusu hesab ediləcək və həmin şəxslərin intizam məsuliyyətinə cəlb olunmasına əsas verəcək. Nazirlik hesab edir ki, yeni mexanizm xüsusi icra institutunun fəaliyyətinin peşəkar əsaslarla inkişafına və məhkəmə qərarlarının icrasının daha səmərəli təşkilinə töhfə verəcək.
