Gündem24.az xəbər verir ki, qida təhlükəsizliyi üzrə ekspert İlkin Şirinov yumurtaların daşınması və saxlanılması zamanı yol verilən ciddi nöqsanlarla bağlı özünün sosial media hesabında kəskin paylaşım edib. Paylaşımda deyilir:
“Çatlamış yumurta yox, çatlamış məsuliyyət – bu səhlənkarlıq insanların süfrəsinə qədər gedib çıxır!”
Bu fotolar təsadüfi mənzərə deyil. Bu, yumurtaların daşınması və anbarlarda saxlanılması zamanı yol verilən kobud səhlənkarlığın acı nəticəsidir.
Yumurta ən həssas qida məhsullarından biridir. Lakin bəzi daşıyıcı şirkətlər və topdansatış anbarları ona sanki daş və ya kərpic daşıyırmış kimi yanaşırlar. Qutuların atılması, normadan artıq üst-üstə yığılması, ehtiyatsız yükləmə-boşaltma və düzgün saxlanma qaydalarına əməl olunmaması nəticəsində məhsulun böyük hissəsi qırılır, çatlayır və istifadəyə yararsız hala düşür.
Ən təhlükəlisi isə odur ki, çatlamış və içərisi axmış yumurtalar sağlam yumurtalarla eyni qutuda saxlanılır. Bu, artıq sadəcə maddi zərər deyil, istehlakçının sağlamlığına qarşı açıq məsuliyyətsizlikdir. Çatlamış qabıq bakteriyalar, xüsusilə Salmonella üçün açıq qapıdır. Bir yumurtanın axıntısı bütün partiyanı çirkləndirə bilər.
Təəssüf ki, bəzi şirkətlər üçün əsas məqsəd keyfiyyət deyil, məhsulu necə olursa-olsun satışa çıxarmaqdır. Halbuki zədələnmiş yumurta dərhal dövriyyədən çıxarılmalı, sağlam məhsullardan ayrılmalı və utilizasiya edilməlidir.
Qida təhlükəsizliyi fabrikin qapısında bitmir. Məhsulu daşıyan da, anbarda saxlayan da, marketə təhvil verən də eyni məsuliyyəti daşıyır. Bu zəncirin bir halqası qırılırsa, nəticəsini istehlakçı ödəyir.
Bu cür hallara görə formal yoxlamalar yox, qəfil və sərt nəzarət tədbirləri həyata keçirilməli, məsuliyyətsiz şirkətlər ciddi şəkildə cəzalandırılmalıdır. Çünki burada söhbət təkcə qırılmış yumurtadan yox, insanların sağlamlığından gedir.
Qida eksperti İlkin Şirinov paylaşımının sonunda bildirib ki, əgər bu nöqsanlar qısa müddət ərzində aradan qaldırılmasa və məsul şəxslər tərəfindən lazımi tədbirlər görülməsə, bu hallara yol verən şirkətlərin adlarını və faktları ictimaiyyətə açıqlayacaq. Onun sözlərinə görə, məqsəd kimisə hədəfə almaq deyil, istehlakçıların sağlamlığını qorumaq və qida təhlükəsizliyi sahəsində məsuliyyət hissini artırmaqdır.
