Məlum olduğu kimi, bir müddət öncə Azərbaycan Prezidenti tərəfindən dəniz suyunun duzsuzlaşdırılması yolu ilə içməli su istehsalı sahəsində pilot layihənin həyata keçirilməsi tədbirləri haqqında Sərəncam imzalanıb. Sərəncama əsasən, bir sıra qurumların üzərinə öhdəliklər düşür. Bu qurumların siyahısında Azərbaycan Dövlət Su Ehtiyatları Agentliyi (ADSEA) də var.
Bəs ADSEA bu çərçivədə hansı işləri görüb?
Mövzu ilə bağlı ADSEA-dan Redaktor.az-a bildirilib ki, dəniz suyunun duzsuzlaşdırılması yolu ilə içməli su istehsalı sahəsində pilot layihənin həyata keçirilməsi üzrə üzrə hazırlıq və layihələndirmə işləri davam etdirilir:
“Su paylayıcı infrastruktura yaxınlıq və dənizin çirklənmə səviyyəsi nəzərə alınaraq, layihə üçün Sumqayıt şəhəri ərazisi məqsədəuyğun hesab edilib (bu ərazi 29,63 ha sahəni və sahil zolağını əhatə edir). Qeyd olunan ərazi İqtisadiyyat Nazirliyinin İqtisadi Zonaların İnkişafı Agentliyinin balansındadır. Duzsuzlaşdırma zavodunun illik istehsal gücü 100 milyon m³ təşkil edəcək ki, bu da Abşeron yarımadasının hazırkı su tələbının 20%-ni təşkil edəcək. 2026-2028-ci illər Sumqayıt Duzsuzlaşdırma Qurğusundan Ceyranbatan su anbarına qədər magistral kəmərin tikintisi də nəzərdə tutulub. Qeyd edək ki, layihənin müddəti 27,5 il təşkil edir (2,5 il tikinti, 25 il istismar)”.
