İkinci əl avtomobil bazarında uzunömürlü və etibarlı modellərin siyahısı açıqlanıb.
Mütəxəssislərin sözlərinə görə, düzgün mühərrik və sürətlər qutusu ilə seçilən bəzi avtomobillər ciddi nasazlıq olmadan 400-500 min kilometr yol gedə bilər. Ən etibarlı modellər sırasında “Volkswagen Polo” və “Skoda Rapid” xüsusi yer tutur. Bu iki model texniki baxımdan bir-birinə çox yaxındır. Ən etibarlı seçim 1,6 litrlik atmosfer mühərriki və klassik avtomatik sürətlər qutusu ilə təchiz olunan versiyalardır. Mütəxəssislər turbo mühərrikli və robotlaşdırılmış sürətlər qutusuna malik avtomobillərdən uzaq durmağı məsləhət görürlər. Bildirilib ki, belə versiyalar daha tez sıradan çıxa və təmir üçün böyük xərc tələb edə bilər. “Volkswagen Polo” və “Skoda Rapid”in istismar müddəti 400-500 min kilometrə çata bilər. 2015-2019-cu il istehsalı olan modellərin qiyməti 25-30 min manat, 2020-2022-ci il avtomobillərinin qiyməti isə 29-37 min manat aralığında dəyişir.
Mütəxəssislər 2015-ci ildən sonrakı “Hyundai Solaris” və “Kia Rio” modellərinə də diqqət yetirməyi tövsiyə ediblər. Bu avtomobillərin 1,6 litrlik atmosfer mühərriki və altıpilləli avtomatik sürətlər qutusu ilə olan versiyaları daha etibarlı sayılır. Lakin avtomobil alınmazdan əvvəl mühərrikin ətraflı yoxlanılması vacibdir. Bəzi Koreya mühərriklərində silindr divarlarında cızıqlar yarana bilər. Bu nasazlıq mühərrikin yağ sərfiyyatını artırır və sonradan bahalı təmirə gətirib çıxarır. Yaxşı vəziyyətdə olan “Hyundai Solaris” və “Kia Rio” modellərinin təxminən 400 min kilometr yol gedə biləcəyi bildirilib. Belə avtomobillərin qiyməti 25-30 min manatdan başlayır.
Gündəm24.az bildirir ki, məsələ ilə bağlı NOCOMMENT.az-a danışan nəqliyyat məsələləri üzrə ekspert Tale Ələddinzadə qeyd edib ki, ikinci əl avtomobil alarkən sürücülər ilk növbədə maşının texniki qulluq tarixçəsinə diqqət yetirməlidirlər: “İnsanlarımız çox vaxt xarici görünüşə aldanaraq texniki bazanı unudurlar. Amma vaxtında qulluq görən atmosfer mühərrikli avtomobillər sahibinə uzun illər problemsiz xidmət edə bilər”. Onun sözlərinə görə, şəhərdaxili ağır sıxlıqda istismar olunan nəqliyyat vasitələrində mühərrik və sürətlər qutusu daha tez köhnəlir: “Buna görə də hər hansı bir avtomobili almazdan əvvəl mütləq peşəkar servisdə hərtərəfli diaqnostikadan keçirmək vacibdir”.
