Bu il ali məktəblərə qəbul planında müəllimlik ixtisasları üzrə yerlərin sayında azalma müşahidə olunur. Bir sıra aparıcı universitetlərdə də ötən illə müqayisədə qəbul planının aşağı salındığı bildirilir. Bu dəyişiklik müəllim kadrlarına olan tələbatın mövcud vəziyyətini yenidən gündəmə gətirir.
Gündəm24.az xəbər verir ki, təhsil eksperti Məzahir Məmmədlinin sözlərinə görə, müəllimlik ixtisası üzrə qəbul yerlərinin minimuma endirilməsi müəllimlərə olan real tələbatın azalması ilə bağlıdır.
Ekspert deyib ki, Azərbaycanda məktəblərin optimallaşdırılması çərçivəsində 500-dən artıq məktəb bağlanıb və ya digər məktəblərə birləşdirilib. Bu proses də müəllimlərin ixtisarına və onların sayının azalmasına səbəb olan amillərdən biridir.
“Hər il müəllimlərin işə qəbulu imtahanında 60-70 min nəfər iştirak edir. Lakin vakansiyaya çıxarılan yerlərin sayı müraciət edənlərin sayından təxminən 10 dəfə, bəzi hallarda isə daha çox az olur”, – deyən M.Məmmədli hesab edir ki, bu səbəbdən müəllim ixtisası üzrə qəbul yerlərinin azalmasına qorxu və təşvişlə yanaşmaq düzgün deyil. Onun sözlərinə görə, bu proses müəllimlər arasında rəqabətin artmasına və daha seçilmiş kadrların təhsil sisteminə cəlb olunmasına imkan verəcək:
“Ona görə də artıq müəllimlərimiz bu rəqabətlilik prinsipi ilə işləyəcəklər və kifayət qədər seçilmiş olacaqlar. Yəni bu işə bilikli, savadlı, bacarıqlı müəllimlər artıq cəlb olunacaq. Müəllim ixtisası üzrə yerlərin azaldılması son illərdə keçirilən müəllimlərin işə qəbulu imtahanlarının nəticələri ilə də əlaqəlidir. İmtahanlara müraciət edənlərin sayı mövcud vakansiyaları dəfələrlə üstələyir və bu vəziyyət müəllim kadrlarına olan real ehtiyacın yenidən qiymətləndirilməsini zəruri edir”.\Sfera.az
