Azərbaycanda quru sərhədlərin uzun müddətdir bağlı qalması təkcə epidemiya və təhlükəsizlik arqumentləri ilə deyil, regionda baş verə biləcək geosiyasi sarsıntıların əvvəlcədən hiss edilməsi kimi də şərh olunur. Yaxın Şərq və ətraf coğrafiyada artan münaqişə riski fonunda bu addım mümkün qaçqın axınının qarşısını almaq, sosial və təhlükəsizlik balansını qorumaq məqsədi daşıyan preventiv tədbir kimi qiymətləndirilə bilər. Dövlətin ehtiyatlı mövqeyi regional qeyri-sabitliyin daxili sabitliyə təsir etməməsi üçün qabaqlayıcı yanaşmanın göstəricisi kimi qiymətləndirmək olarmı?
Bölgədəki gərginliyin yüksəlməsi fonunda sərhəd siyasətində dəyişikliklər gözlənilirmi?
Mövzu ilə bağlı KONKRET.az-a açıqlama verən politoloq, siyasi elmlər üzrə fəlsəfə doktoru Zaur Məmmədov bildirib ki, Cənubi Qafqaz ölkələri içərisində ən yaxın regionda çox ciddi çağırışlar var və bu çağırışların daha çox hissəsi məhz Azərbaycan, Qafqaz ətrafında baş verməkdədir.
Politoloqun sözlərinə görə, belə olan təqdirdə biz görürük ki, doğrudan da neoimperalizmi həm dünyanın ayrı-ayrı ölkələri, həm də regionun ayrı-ayrı ölkələri bu gün yenidən öz xarici siyasətlərində yanaşma kimi qəbul etməyə başlayıblar.
“Biz görürük ki, ayrı-ayrı istiqamətlərdən çox ciddi şəkildə informasiya müharibəsi getməkdədir. Və informasiya müharibəsi əlbəttə ki, müəyyən məsələlərə bir zəmin hazırlanması məqsədini daşıya bilər”, – deyə politoloq əlavə edib.
Sərhəd məsələlərinə toxunan politoloq Zaur Məmmədov əlavə edib:
“Rusiya və Ukrayna arasında gedən müharibə son bir il ərzində 2-ci dəfə artıq İranda müharibənin baş verməsi və ümumilikdə ətraflarda kifayət qədər ciddi şəkildə ziddiyyətli məsələlərin olması sərhəd mövzusunu aktual edir. Dövlətin sərhədlərinin qorunması və təhlükəsizliklə məsələlərini gündəmə gəlir”.
“Əgər sərhədlərin bağlanması qərarı hələ də qüvvədədirsə və vaxtilə bu qərar verilmişdirsə, hər dəfə sərhədlərin bağlanması uzadılırsa, deməli, belə məqsədə müvafiq idi. Dövlətin bildiyi məsələlər var ki, bunu ancaq dar çərçivədə bilirlər”, – deyə politoloq əlavə edib.
“Nəticə etibarilə biz bu gün də, bir daha onun şahidi olduq ki, Azərbaycanın təhlükəsizliyi üçün bu vacib addımlardan biri idi. Baxın, bəzi ölkələr hal-hazırda İranla sərhədlərini bağlayıblar. Hansıki, müharibəyə qədər açıq idi. Bəzi ölkələr bu və ya digər şəkildə faktiki olaraq elan etməsələr də İranla sərhədləri bağlayıblar. Biz ara-sıra bu kimi məsələləri digər istiqamətlərdə də görürük. Vaxtilə Suriyada da vətəndaş müharibə başlayanda demək olar ki, biz gördük Suriya qaçqınları hansı istiqamətə getdilər. Digər ölkələr isə faktiki olaraq qapılarını onlara bağlamışdı. Yəni, burada sırf siyasi prosesləri tez duymaq və çevik hərəkət etmək lazımdır. Əlbəttə ki, Azərbaycan bu beynəlxalq münasibətlər sistemində bu gün aparıcı dövlətlərdən biridir. Biz görürük ki, Azərbaycanın atdığı cəld və vaxtında düşünülmüş addımlar onun təhlükəsizliyinin qorunması üçün əsas istiqamətlərdən biridir. Bu gün İranda müharibə gedir və İran ayrı-ayrı ölkələrə zərbələr endirərək oradakı Amerika hücumlarına qarşı bir əks-hücum tədbirləri görməkdədir. Amma digər tərəfdən biz bu ölkələrin hansılar olduğunu görməkdəyik. Dəfələrlə, vaxtikən Azərbaycana da çox güman ki, müraciətlər də edilmişdir, istənilmişdi ki, Qafqaz ərazisində bu və yaxud digər şəkildə bəzi ölkələri öz maraqları üçün istifadə etsinlər. Amma Azərbaycan hakimiyyəti heç vaxt icazə verməyib ki, onun ərazisindən qonşu dövlətlərə qarşı istifadə edilsin. Baxın, praqmatik, çevik və gələcəyi əvvəldən duymaq siyasəti budur. Elə sərhədlər məsələsi də gələcəyə əvvəldən həssaslıqla yanaşmaq deməkdir. Həmçinin, gələcək hadisələri təxmin etmək və düzgün proqnozlaşdırmaq idi”, – Zaur Məmmədov sonda qeyd edib.
