PKK terror təşkilatının bölmələri Şimali İraqdan İrana kütləvi şəkildə keçərək əvvəllər Qəndil dağı ərazisində yerləşən böyük bir bazanı orada yaradır. “Türkiyə” qəzetinin məlumatına görə, İran qolu PJAK-ın fəaliyyəti qonşu Türkiyə və Azərbaycanın təhlükəsizliyinə də təhdid ola bilər.
Mövzu ilə bağlı KONKRET.az -a açıqlama verən Ağ Partiya sədri Tural Abbaslı bildirib:
“PKK, YPG və digər terror təşkilatlarının regionda fəaliyyəti təhlükəlidir. Bu qruplar silahlı birləşmədir və heç bir beynəlxalq hüquqa tabe olmurlar. Öz maraqları hər şeydən üstündür, dövlət deyillər ki, onlarla danışıqlar aparmaq mümkün olsun”.
Azərbaycan üçün olan təhlükələrdən danışan T. Abbaslı deyib:
“Terror təşkilatlarının varlığı həmin regiondakı bütün dövlətlərin suverenliyi, ərazi bütövlüyü və sabitliyi üçün təhlükədir. Bu fəaliyyət həm İran, həm Türkiyə, həm də Azərbaycan üçün qeyri-stabillik yaradır. Hər hansı bir terror qruplaşması gücləndikcə, onun uzantıları ölkəmizə də yayıla bilər. Biz PKK və onun ideoloji bazasına baxanda görürük ki, onların iddiaları birbaşa Azərbaycan ərazilərinə də, suverenliyinə də təhdid yaradır. Çünki Azərbaycanda da bəzi əraziləri özlərinin uydurma bir “Kürdüstan” dövlətinin tərkib hissəsi kimi görürlər”.
Buna görə Azərbaycan, Türkiyə, İran və İraq maraqlı olmalıdır ki, bu terror qrupları birdəfəlik məhv edilsin. Onlar dünən İraqda idisə, bu gün İranda, sabah isə Azərbaycanda ola bilərlər. Türkiyə 40 ilə yaxındır ki, PKK ilə mübarizə aparır. Terror fəaliyyətinə göz yummamalı və qonşu dövlətlərin mübarizəsinə dəstək verməliyik ki, bu “qara yara” regionda böyüməsin”.
Abbaslı həmçinin vurğulayıb ki, Amerika və İsrail PKK-nın İraq və İran uzantılarından öz məqsədləri üçün istifadə etməyə çalışır:
“Bu doğru siyasət deyil. Zamanında Amerika bunu Əfqanıstanda Taliblərə dəstək verərək etmişdi. Sonra özü Taliblərlə müharibəyə girişdi. Bumeranq kimi özlərinə döndü. Düzdür, Taliblər indi terror təşkilatı deyil. Amm hər halda, belə proksi qüvvələrdən istifadə etmək uzunmüddətli siyasi gedişatlarda uğurlu deyil”.
