ABŞ-ın xüsusi elçiləri Vitkoff və Kuşnerin çərşənbə axşamı İsrailə səfər edərək Baş nazir Netanyahu ilə görüşəcəkləri bildirilir.
Gündəm24.az xəbər verir ki, Axios xəbər portalı mənbəyə istinadən bildirib ki, Yaxın Şərqdə gərginliyin artdığı bir vaxtda ABŞ diplomatiyası yeni addım atmağa hazırlaşır. Məlumata görə, Ağ Evin xüsusi elçisi Stiv Vitkoff və ABŞ prezidenti Donald Trampın kürəkəni Cared Kuşner İsrailə səfər etməyi planlaşdırır. Səfərin əsas məqsədi İrana qarşı davam edən hərbi əməliyyatların dayandırılması ehtimalını İsrailin baş naziri Binyamin Netanyahu ilə müzakirə etməkdir.
Məlumatlara görə, ABŞ nümayəndələri yaxın günlərdə Netanyahu ilə görüş keçirərək regiondakı vəziyyəti müzakirə etməyi planlaşdırırlar. Vaşinqton bu görüş vasitəsilə mümkün diplomatik addımları və münaqişənin genişlənməsinin qarşısını almaq yollarını qiymətləndirmək istəyir.
Bundan əvvəl Donald Tramp müsahibələrindən birində İrana qarşı əməliyyatların dayandırılması ilə bağlı qərarın İsrail rəhbərliyi ilə məsləhətləşmələr əsasında verilə biləcəyini bildirmişdi. Bu açıqlama Vaşinqton və Təl-Əviv arasında koordinasiyanın davam etdiyini göstərir.
Xatırladaq ki, ABŞ və İsrail fevralın sonunda İranın nüvə proqramı ilə bağlı danışıqlar davam etdiyi vaxtda Tehrana qarşı hərbi hücumlara başlamışdı. Buna cavab olaraq İran da regionda müxtəlif hədəflərə, o cümlədən bəzi ABŞ hərbi bazalarına zərbələr endirmişdi.
Məlumatlara görə, qarşıdurma nəticəsində çox sayda itki qeydə alınıb. İran tərəfi hücumlar zamanı yüksək vəzifəli şəxslərin həlak olduğunu bildirir, eyni zamanda ölkənin Səhiyyə Nazirliyi yüzlərlə mülki vətəndaşın həyatını itirdiyini açıqlayıb. Regionda vəziyyət hələ də gərgin olaraq qalır və beynəlxalq ictimaiyyət mümkün eskalasiyanın qarşısını almaq üçün diplomatik səylərin artırılmasının vacibliyini vurğulayır.
Sədaqət Həsənova
