Sumqayıt şəhərində fəaliyyət göstərən “Cahangir-2020 Lor Center” Məhdud Məsuliyyətli Cəmiyyətdə (MMC) qanun pozuntusu aşkar olunub.
Məlumata görə, Səhiyyə Nazirliyi Analitik Ekspertiza Mərkəzinin Tibbi nəzarət şöbəsi tərəfindən MMC-də yoxlama aparılıb.
Yoxlama zamanı Sumqayıt şəhəri, H.Əliyev prospekti, 208E ünvanında yerləşən “Cahangir-2020 Lor Center” MMC-yə məxsus özəl tibb müəssisəsində keçirilən plandan kənar yoxlama zamanı həkim Nurlan Söhbət oğlu Bəylərovun sertifikatsız praktik tibb fəaliyyətinə buraxılması faktı aşkarlanıb.
MMC-nin barəsində İnzibati Xətalar Məcəlləsinin 215.4-cü maddəsi ilə protokol tərtib edilib.
MMC-nin nümayəndəsi Cahangir İsmayılov bildirib ki, özəl klinika işlədir və oranın bəlli sayda həkimi var.
“Nurlan adlı həkim 2021-ci ildə təhsilini bitirib. Həkimlər 5 ildən bir sertifkasiya olmalıdır. Klinakada olan həkimlərin hamısı birlikdə sertifikasiyadan keçməyə gediblər. Lakin Səhiyyə Nazirliyindən bildirilib ki, Nurlana ehtiyac yoxdur, o 2027-ci ildə sertifikasiyadan keçməlidir. Buna baxmayaraq daha sonra yenidən Nurlanı sertifikasiyadan keçirilməyə göndərdik. Yenə onu geri qaytardılar. Təxminən 20-30 dəfə nazirliklə telefon əlaqəsi saxladıq. Bizim yeganə səhvimiz sertifikasiyadan keçməyən işçini işlətmək olub”, – MMC-nin nümayəndəsi bildirib.
Sumqayıt Şəhər Məhkəməsinin qərarı ilə MMC İnzibati Xətalar Məcəlləsinin 215.4-cü maddəsi ilə təqsirli bilinib və 6 min manat cərimə edilib.
Mənbə: Teleqraf.az
