Sumqayıtın Məhəmməd Əsədov küçəsində yaranan vəziyyət narahatlıq doğurur.
Bu barədə Sumqayit24.az-a sakinlər məlumat veriblər.
Şikayətçilərin sözlərinə görə, 52-ci məhəllədə, “Daş bazarı” kimi tanınan ərazinin yaxınlığında küçənin bir hissəsində avtomobillər park edilir. Bildirilir ki, bu səbəbdən ərazidə digər nəqliyyat vasitələrinin hərəkətində çətinlik yaranır.
Qeyd olunub ki, xüsusilə yük avtomobillərinin əraziyə daxil olması zamanı park edilmiş nəqliyyat vasitələri problem yaradır.
“Yolun bir hissəsini zəbt ediblər, məhəlləyə girib-çıxmaq çətinləşib. Xüsusilə uşaqlar və yaşlılar bu yoldan istifadə edirlər.
Əlacsızlıqdan onlar yolun ortası ilə hərəkət etməli olurlar ki, bu da həm onların, həm də hərəkətdə olan avtomobillərin təhlükəsizliyi üçün risk yaradır”, – deyə vətəndaşlar qeyd ediblər.
Sakinlər aidiyyəti qurumlardan əraziyə baxış keçirilməsini və problemin aradan qaldırılmasını tələb edirlər.
