Sumqayıtın özünəməxsus rəmzlərindən biri də vaxtilə dəniz sahilində dayanan “Titanik” idi. Hər kəs onu “Sumqayıtın Titaniki” adlandırsa da, köhnə neft tankerinin adı “Nəriman Nərimanov” olub. Xəzər Dəniz Gəmiçilik İdarəsinin balansında neft daşıyan tankerin istismar müddəti başa çatdıqdan sonra 1981-ci ildə Sumqayıt rəhbərliyi tərəfindən 50 min sovet rublu müqabilində alınaraq sahilə gətirilir.
Məqsəd sadə idi: bu nəhəng polad gövdəni Sumqayıt gəncləri və sakinləri üçün fərqli ab-havalı, dəniz mənzərəli bir gəmi-restorana (kafeyə) çevirmək. Qısa müddətdə rekonstruksiya işləri aparılır və tanker qapılarını müştərilərin üzünə açır. İlk illərində bura şəhərin ən prestijli və populyar əyləncə məkanlarından birinə çevrilir. Amma unudulan bir məqam gəminin Titanikin taleyini yaşamasına səbəb oldu. Neft tankerləri dənizdə içərisi boş saxlanıldıqda mütləq ballast, yəni ağırlıq üçün su ilə doldurulmalıdır. Lakin sahildə lövbər salan bu gəmidə çəki qonşuluğu düzgün hesablanmadı. Gəminin ön və arxa hissələrinin ağırlığı mərkəzi hissədən qat-qat çox olduğundan, fiziki təzyiqə dözməyən nəhəng gövdə iki yerə bölündü. Bu qəzadan sonra təhlükəsizlik səbəbindən restoran fəaliyyəti tamamilə dayandırıldı. Gəmi yarıbatmış və sınmış vəziyyətdə dənizin qoynunda tənha qaldı.
Fəaliyyətini dayandırsa da, gəmi Sumqayıtın sosial həyatından çıxmadı. Əksinə, 25 ildən çox bir müddətdə uşaqların, gənclərin və yaşlıların ən sevimli ekstremal əyləncə zonasına çevrildi. Sumqayıtda böyüyən hər bir yeniyetmənin ömründə heç olmasa bir dəfə gəminin içinə gizlicə girmək, onun paslı pilləkənləri ilə yuxarı dırmaşmaq kimi bir “şücaəti” var idi. Hər səhər onlarla sakin qarmağını gəminin göyərtəsindən Xəzərə atırdı. O dövrün gəncləri, sevgililəri və dostları mütləq arxa fonda bu gəmi olmaqla xatirə şəkilləri çəkdirərdilər.
Sumqayıt müasirləşdikcə və dənizkənarı bulvarın tikintisi layihəsi gündəmə gəldikdə, bu paslı və təhlükəli metal yığınının sahildə qalması artıq qeyri-mümkün idi. Beləliklə, bulvarın inşasından bir qədər əvvəl, yəni 2012-ci ildə xüsusi texnikalar cəlb olunaraq gəminin qalıqları doğrandı və ərazidən tamamilə təmizləndi.
“Sumqayıtın Titaniki” fiziki olaraq sahildən yox olsa da, bu gün də köhnə sumqayıtlıların albomlarındakı saralmış fotolarda və dəniz kənarından keçən hər kəsin xatirələrində yaşamaya davam edir.
