Ermənistan parlamentinin növbədənkənar iclası zamanı hakimiyyət və müxalifət nümayəndələri arasında növbəti dəfə kəskin söz davası düşüb və qarşıdurma yaranıb.
Gündəm24.az KONKRET.az-a istinadən xəbər verir ki, məlumata görə, hakim “Vətəndaş Müqaviləsi” fraksiyasının deputatı Tsovinar Vardanyan kürsüyə yaxınlaşaraq müxalifətin iclasda iştirak səbəbi ilə maraqlanıb və onların davamlı yoxluğuna artıq öyrəşdiklərini kinayə ilə qeyd edib.
Onun bu bəyanatına müxalif “Hayastan” (Ermənistan) fraksiyasının deputatı Artsvik Minasyan sərt cavab verib. Hakimiyyətin bu cür yanaşmasını kəskin tənqid edən Minasyan vurğulayıb ki, kimin iclaslarda iştirak edib-etməyəcəyinə hakimiyyət qərar verə bilməz. O əlavə edib ki, hakim komanda bu məntiqlə sabah insanların gündəlik fərdi seçimlərini də tənzimləməyə cəhd edə bilər.
Alen Simonyan mübahisəyə qoşuldu
Yaranan gərgin müzakirəyə parlamentin sədri Alen Simonyan da müdaxilə edib. O, Tsovinar Vardanyanın xalq tərəfindən seçilmiş deputat olduğunu və onun sözlərinə görə, seçkilərdə müxalifətə iki dəfə qalib gəlmiş siyasi qüvvəni təmsil etdiyini xatırladıb. Simonyan müxalifətçi deputat Minasyanı korrektlik sərhədlərini qorumağa çağırıb.
Cavabında isə Artsvik Minasyan eyni sualı spikerin özünə ünvanlayıb və Alen Simonyandan “Bəs siz niyə iclasa gəlmisiniz?” deyə soruşub.
