İranın paytaxtı Tehran vilayətində çörəyin qiyməti rəsmi şəkildə kəskin bahalaşıb. Bu addım daha əvvəl ölkənin digər regionlarında müşahidə olunan bahalaşma dalğasının paytaxta çatması kimi qiymətləndirilir.
NOCOMMENT.az xəbər verir ki, İran Sənaye Palatasının un və çörək işçi qrupunun rəhbəri Məhəmməd Cavad Kərimi yeni qiymətləri açıqlayıb. Qərara əsasən, Tehranda yuxa çörəyinin qiyməti 2 700 tümənə, bərbəri çörəyinin qiyməti 10 000 tümənə, səngək çörəyinin qiyməti isə 15 500 tümənə yüksəlib.
Qeyd edək ki, qiymət artımı yalnız paytaxtla məhdudlaşmayıb. Bundan əvvəl Qərbi Azərbaycan, Mazandaran, Məşhəd və Həmədan kimi bölgələrdə də çörəyin bahalaşması barədə məlumatlar yayılmışdı.
Çörək İranın aşağı gəlirli ailələri üçün ən əsas və sabit qida mənbəyi hesab olunur. Ekspertlər bildirir ki, ölkədə ət, süd məhsulları və meyvənin qiymətinin bahalaşması səbəbindən bir çox ailələrin rasionundan çıxması nəticəsində, çörək onların ərzaq təhlükəsizliyinin yeganə dayağına çevrilib. Bu kəskin bahalaşma isə sosial vəziyyəti daha da ağırlaşdıra bilər.
