İran Xarici İşlər Nazirliyi ABŞ-nin ölkə ərazisinə endirdiyi zərbələrlə bağlı sərt bəyanat verib.
Sfera.az xəbər verir ki, nazirliyin sözçüsü İsmayıl Bəqayi bildirib ki, ABŞ-nin mülki infrastruktur obyektlərini hədəfə alması terror təşkilatı İŞİD-in fəaliyyətini xatırladır.
Onun sözlərinə görə, Çabahar şəhərindəki müşahidə qüllələrinə, körpülərə və elektrik stansiyalarına endirilən zərbələr terrorçuların həyata keçirdiyi hücumlarla oxşarlıq təşkil edir.
“Çabahardakı müşahidə qüllələrinə, körpülərə və elektrik stansiyalarına edilən hücumlar İŞİD terror təşkilatının həyata keçirdiyi hərəkətləri xatırladır”, – deyə Bəqayi brifinq zamanı bildirib.
Xatırladaq ki, ABŞ və İran arasında gərginliyin son mərhələsi iyulun 8-də başlayıb. Məlumata görə, Vaşinqton və
Tehran arasında memorandumun imzalanmasından sonra ilk dəfə ABŞ qüvvələri İran ərazisinə bir neçə hava zərbəsi endirib. Vaşinqton bu hücumların Hörmüz boğazında ticarət gəmisinə qarşı həyata keçirilən hücuma cavab olduğunu açıqlayıb.
