Rusiyanın Moskva şəhərində 17–18 may tarixlərində müşahidə olunan güclü yağışlar genişmiqyaslı daşqınlara səbəb olub. Nəticədə şəhərin bir sıra ərazilərində nəqliyyat və infrastruktur ciddi çətinliklərlə üzləşib.
Ajans.az “Pravda” qəzetinə istinadən xəbər verir ki, xüsusilə VDNX (Ümumrusiya Sərgi Mərkəzi) ərazisində güclü sel müşahidə olunub. Yağış suları bəzi yol maneələrini yuyub aparıb.
Meteoroloqlar bildiriblər ki, yağıntı göstəriciləri 1904-cü ildən bəri qeydə alınan rekord səviyyəni keçib. VDNX stansiyasında 34 mm yağıntı qeydə alınıb ki, bu da aylıq normanın yarısından çoxdur.
Moskva ətrafında da oxşar vəziyyət qeydə alınıb: Dolqoprudnıda 25 mm, Nemçinovka və Novo-Yerusəlimdə isə 19 mm yağıntı düşüb. Şəhər infrastrukturu həddindən artıq yüklənmə ilə işləyib.
Mütəxəssislər bildirirlər ki, belə intensiv yağışlar drenaj sistemləri üçün ciddi sınaqdır və iqlim dəyişikliyi fonunda bu cür hadisələrin daha tez-tez təkrarlana biləcəyi istisna edilmir.
Sosial şəbəkələrdə isə paytaxtın müxtəlif ərazilərindən daşqın görüntüləri, o cümlədən Ostankino qülləsi yaxınlığında ildırım çaxmaları paylaşılıb.
