Ermənistan mövcud infrastrukturdan istifadə edərək Kornidzor-Gorus-Yeğeqnadzor-Yerask marşrutu üzrə Azərbaycanın qərb bölgələri ilə Naxçıvan Muxtar Respublikası arasında avtomobil əlaqələri yaratmağa hazırdır.
Gündəm24.az xəbər verir ki, bu barədə Ermənistanın Baş naziri Nikol Paşinyan martın 11-də Strasburqda Avropa Parlamentində çıxışında bildirib.
“Təklifimiz heç bir şəkildə Vaşinqton razılaşmalarını gecikdirmək, pozmaq və ya görməzdən gəlmək məqsədi daşımır və mən bunu rəsmi olaraq bildirirəm. Biz bu təklifi irəli sürürük, çünki özümüz Azərbaycan dəmir yollarından alternativ şəkildə istifadə edirik. Azərbaycan Ermənistan ərazisi vasitəsilə Naxçıvan Muxtar Respublikası ilə əlaqə qurmağı səbirsizliklə gözlədiyi kimi, biz də Naxçıvan vasitəsilə Ermənistanın cənubu və şimalı arasında dəmir yolu əlaqəsi qurmağı səbirsizliklə gözləyirik”, – Paşinyan bildirib.
Paşinyan qeyd edib ki, Ermənistan üçün bu dəmir yolu marşrutunun alternativi yoxdur:
“Çünki ölkəmizin dağlıq ərazisi ölkənin cənubu ilə şimalı arasında dəmir yolu əlaqəsini təmin etmək üçün başqa heç bir vasitəyə imkan vermir. Gördüyünüz kimi, Ermənistan və Azərbaycanın bu baxımdan gözləntiləri ardıcıldır. Onu da qeyd etmək lazımdır ki, biz Gürcüstan-Azərbaycan dəmir yolundan ixrac üçün də istifadə etməyi planlaşdırırıq. Ümid edirəm ki, yaxın gələcəkdə Azərbaycan da Ermənistan üçün ixracat məkanına çevriləcək. Ermənistan artıq Azərbaycandan neft məhsulları idxal edir ki, bu da bazarımızda neft məhsullarının qiymətlərinin aşağı düşməsinə və onilliklər ərzində neft məhsulları bazarında mövcud olan inhisarların aradan qaldırılmasına səbəb olub.
Həmçinin Gürcüstanın Baş nazirinə Ermənistan və Azərbaycan arasında dəmir yolu əlaqəsinə və ümumilikdə sülh prosesinə verdiyi dəstəyə görə təşəkkür etmək istərdim”.
