Putindən sonra hakimiyyətin kimə keçəcəyi bir seçki yox, sistem daxilində balans məsələsidir. Buna görə də hər namizədin şansı onun populyarlığı ilə yox, sistemdəki çəkisi ilə ölçülür.
Gündəm24.az xəbər verir ki, bu barədə araşdırmaçı-jurnalist Elbəyi Həsənli qeyd edib.
O, ən real və ən güclü namizədlərdən birinin 30% reytinqlə Nikolay Patruşev olduğunu vurğulayıb:
“O, təhlükəsizlik aparatının içindən gəlir və Putinə ideoloji olaraq çox yaxındır. Onun üstünlüyü sistemin “dərin dövlət” hissəsini təmsil etməsidir. Əgər hakimiyyət sərtləşmə xəttini seçərsə, ən böyük şans onun tərəfindədir”.
Onun sözlərinə görə, ikinci real namizəd 25% reytinqlə Baş nazir Mixail Mişustindir:
“Texnokrat və kompromis fiqur. Əgər elita sabitlik və iqtisadi balans istəsə, onun şansı ciddi şəkildə artar. O, münaqişə yaratmayan, idarə edən tip liderdir.
Sistem üçün tanış və təhlükəsiz fiqur 15% reytinqə sahib Dmitri Medvedyevdir. Amma əsas problem budur: müstəqil lider kimi qəbul edilmir. Onun şansı yalnız bir halda artır: arxa planda başqa güc mərkəzi qalarsa.
Sergey Sobyanin – 10%
Regional və idarəçilik gücü olan fiqur! Moskva üzərində nəzarət böyük üstünlükdür. Amma onun problemi milli səviyyədə zəif siyasi çəkidir.
Sergey Lavrov – 10%
Diplomatik fiqur və keçid variantı. Əgər sistem Qərblə münasibətləri yumşaltmaq istəsə, bu variant gündəmə gələ bilər. Amma uzunmüddətli lider olması çətin görünür.
Digər (naməlum fiqur) – 10%
Ən çox gözardı edilən, amma real variantlardan biri. Kreml daxilində geniş tanınmayan, amma sistem üçün uyğun bir fiqur önə çıxa bilər.
Tarixdə bu çox olub.
Ümumi mənzərə belədir. Faizlər dəyişə bilər. Amma istiqamət aydındır: təhlükəsizlik bloku və ya texnokrat balansı.
Bu o deməkdir ki: Putindən sonra gələn lider ya sərt xətti davam etdirəcək, ya da sistemi qoruyaraq yumşaldacaq.
Ən yüksək ehtimal iki modeldir:
1. sərt təhlükəsizlik lideri
2. kompromis texnokrat
Amma hər iki halda dəyişməyən bir şey var: sistem qalır.
Qərb üçün isə əsas məsələ konkret şəxsdən çox davranış modelidir. Ona görə də Qərb ən çox Mixail Mişustin tipli texnokrat və ya Sergey Lavrov kimi praqmatik, idarəolunan və proqnozlaşdırıla bilən fiqurun gəlməsini istəyər.
Belə lider müharibəni genişləndirməz, iqtisadi sabitliyi qorumağa çalışar və Qərblə münasibətləri tam normallaşdırmasa da, ən azı idarə olunan səviyyəyə endirər. Qərb üçün ən arzuolunmaz ssenari isə Nikolay Patruşev kimi sərt təhlükəsizlik xəttinin hakimiyyətə gəlməsidir, çünki bu, qarşıdurmanın daha da dərinləşməsi demək olardı.
Putindən sonra kim gələcək sualının cavabı var, amma daha vacib sual hələ açıqdır: kimin gəlməsindən asılı olmayaraq, nəsə dəyişəcəkmi?..”/axar.az
