Rusiya Qara dənizdə Türkiyəyə məxsus “Viva” yük gəmisinə hücum edib. Gəminin göyərtəsində 11 Türkiyə vətəndaşının olduğu bildirilir. Diqqətçəkən məqam isə bundan cəmi bir neçə gün əvvəl – dekabrın 12-də Ukraynanın Odessa limanında Türkiyəyə məxsus başqa bir yük gəmisinin də hücuma məruz qalmasıdır. Ardıcıl insidentlər Türkiyənin təhlükəsizliyi ilə bağlı ciddi suallar yaradır.
Gündəm24.az Globalinfo.az-a istinadən xəbər verir ki, məsələ ilə bağlı politoloq Oqtay Qasımovla müsahibə edib.
– Türkiyəyə qarşı bu hücumlar təsadüfidir, yoxsa Rusiya üçün zərurətə çevrilib?
– Rusiyanın Türkiyəyə məxsus gəmiləri hədəfə alması ciddi suallar və narahatlıq doğurur. Qısa müddət ərzində ikinci dəfə Türkiyə gəmisinin vurulmasını təsadüf hesab etmirəm. Hazırda Ukrayna limanlarına ən çox daxil olan gəmilər məhz Türkiyəyə məxsusdur.
– Rusiya Türkiyəyə qarşı niyə bu cür addımlar atır?
–Ankara ilə Kiyev arasında əlaqələr genişdir. O cümlədən Türkiyə Ukraynanın ərazi bütövlüyü ilə bağlı birmənalı mövqe sərgiləyən dövlətlərdən biridir. Bu mövqe bütün platformalarda, eyni zamanda Rusiya Prezidenti Vladimir Putinlə keçirilən görüşlərdə qarşı tərəfin diqqətinə çatdırılıb.
– Bu prosesi Rusiyanın Türkiyəyə qarşı müharibə elanı kimi qiymətləndirmək olarmı?
– Şübhəsiz ki, Rusiya son dövrlər özünü müəyyən qədər güclənmiş hesab edir və bu fonda müxtəlif dövlətlərə qarşı təzyiqləri artırmağa çalışır. Lakin hesab edirəm ki, gəmilərin qəsdən hədəfə alınması halında belə, bu davranışlar Rusiyaya ciddi uğur gətirməz. Çünki Moskvanın Ankaraya çox ciddi ehtiyacı var.
Oqtay Qasımov
– Ankaranın cavabı nə olacaq?
– İkitərəfli münasibətlərin hazırkı səviyyəsi, Rusiya və Türkiyə liderlərinin Aşqabadda keçirilən görüşü, eləcə də Putinin yaxın vaxtlarda Türkiyəyə səfəri ilə bağlı yayılan məlumatlar göstərir ki, tərəflər bu tip məsələləri qarşılıqlı anlaşma və dialoq yolu ilə həll edəcəklər. Rusiya tərəfi bu hadisələr qəsdən baş vermiş olsa belə, onları müharibə şəraiti və müəyyən təsadüflərlə izah etməyə çalışacaq.
– Bu addımla Rusiya Türkiyəyə Ukrayna məsələsində tutduğu mövqedən geri çəkilməli olduğu barədə mesaj verməyə çalışa bilərmi?
– Hesab etmirəm ki, bu, Türkiyəyə Ukrayna ilə bağlı mövqeyindən geri çəkilməsi yönündə verilmiş bir mesajdır. Belə bir ehtimal irəli sürülə bilər, lakin Türkiyənin bu məsələdə mövqeyinin dəyişəcəyini düşünmək sadəlövhlük olardı. Çünki Ankaranın Ukraynanın ərazi bütövlüyü ilə bağlı mövqeyi birmənalıdır.
