Rusiya ərazisində strateji obyektlərin və rəhbər şəxslərin təhlükəsizliyinin gücləndirilməsi istiqamətdə növbəti addım atılıb. Rusiya Prezidenti Vladimir Putinin Valdaydakı rəsmi iqamətgahının yaxınlığında dronlara qarşı xüsusi müdafiə sistemləri yerləşdirilib.
Gündəm24.az xəbər verir ki, Rusiyanın Novqorod vilayətindən keçən “M-10” federal avtomobil magistralında, Valday şəhəri yaxınlığında yerləşən yük avtomobillərinin parklanma zonalarının üzərində antidron şəbəkələri quraşdırılıb. Sözügedən qoruyucu konstruksiyaların yerləşdiyi ərazi Rusiya lideri Vladimir Putinin Valdaydakı məşhur iqamətgahından cəmi 9 kilometr məsafədədir.
Rusiyanın müstəqil “Agentstvo” nəşrinin yaydığı məlumata görə, bu tipli xüsusi qoruyucu şəbəkələr hazırda döyüş əməliyyatları zonasında hərbi texnika və strateji binaların mühafizəsi üçün aktiv şəkildə tətbiq olunur. Bu mühəndis konstruksiyaları mühüm obyektləri kiçikölçülü pilotsuz uçuş aparatlarının (PUA) birbaşa zərbələrindən, eləcə də dronların yuxarıdan atdığı müxtəlif növ partlayıcı sursatlardan qorumaq məqsədi daşıyır. Ekspertlər bu addımı Ukrayna PUA-larının Rusiya daxilindəki hədəflərə, o cümlədən logistik qovşaqlara artan hücum təhdidləri ilə əlaqələndirirlər.\\nocomment.az
