Müəllimlər peşə fəaliyyətləri zamanı etik davranış qaydalarına ciddi şəkildə əməl etməlidirlər. Bu qaydalar müəllimlərin yalnız dərs prosesində deyil, həm də ictimai davranışında, həmkarları və rəhbərliklə münasibətlərində, eləcə də cəmiyyət qarşısındakı məsuliyyətində əsas meyar hesab olunur.
Gündəm24.az xəbər verir ki, bu barədə “Müəllimlərin etik davranış qaydaları”nda qeyd olunub.
Qaydalara əsasən, müəllim peşə fəaliyyətini qanunvericiliyin tələblərinə uyğun qurmalı, vicdanlı və peşəkar davranmalı, şəxsi nümunəsi ilə şagirdlərin, valideynlərin və cəmiyyətin təhsil sisteminə inamını möhkəmləndirməlidir.
Sənədə görə, müəllim işlədiyi və ya digər təhsil müəssisələrinin, eləcə də dövlət qurumlarının fəaliyyəti ilə bağlı (qanunsuz hallar istisna olmaqla) ictimai tənqidi çıxışlardan və mənfi ictimai qiymətləndirmələrdən çəkinməlidir. Həmçinin müəllim adına və təhsil müəssisəsinin nüfuzuna xələl gətirə biləcək hərəkətlərə yol verməməlidir.
Etik davranış qaydalarında müəllimin təhsilalanlarla, valideynlərlə, həmkarları və rəhbərliklə münasibətlərində nəzakətli, xeyirxah və təmkinli olması, irad və tənqidləri qəbul etməsi, xarici görünüşünə və geyiminə xüsusi diqqət yetirməsi də tələb olunur.
Sənəddə vurğulanır ki, müəllim peşə fəaliyyətində qərəzsiz olmalı, irqi, milli, dini, siyasi və digər mənsubiyyətə görə ayrı-seçkiliyə yol verməməli, siyasi bitərəfliyini qorumalıdır.
Bundan başqa, müəllim təhsilalanların, onların valideynlərinin və həmkarlarının şəxsi məlumatlarının məxfiliyini təmin etməli, qanunvericilikdə nəzərdə tutulmayan hallarda həmin məlumatları yaymamalıdır.
Eyni zamanda, müəllim işlədiyi təhsil müəssisəsi ilə bağlı kütləvi informasiya vasitələrinin qanunvericiliyə uyğun şəkildə düzgün məlumatlandırılmasına da kömək göstərməlidir.
