Biologiya müəllimlərinin sertifikasiya imtahanı ilə bağlı narazılığı gündəmdədir. Bəzi müəllimlər iddia edir ki, imtahanda onlara ixtisaslarına aid olmayan, riyaziyyat məzmunlu suallar təqdim edilib. Hətta onlar bununla bağlı rəsmi qaydada şikayət etdiklərini bildiriblər. Bununla yanaşı, sertifikasiya imtahanında maksimum keçid balı olan 60 balı toplaya bilməyən tarix müəllimlərinin bir qismi də narazılıqlarını dilə gətirirlər. Onlar bildirirlər ki, imtahanda yer alan kurikulum sualları həddindən artıq çətin olub və bu səbəbdən yüksək nəticə əldə etməkdə çətinlik çəkiblər.
Redaktor.az xəbər verir ki, sosial şəbəkələrdə də mövzu geniş müzakirə olunur.
Müəllimlər “30 ilin müəllimini savadsız damğası ilə qapı önünə qoyurlar” şüarı ilə sertifikasiya prosesini tənqid edir, uzun illər pedaqoji fəaliyyət göstərən müəllimlərin yalnız imtahan nəticələrinə görə qiymətləndirilməsinin doğru olmadığını qeyd edirlər. Ümumilikdə bir sıra müəllimlər sertifikasiya imtahanından narazılıqlarını bildirirlər. Hətta bu müəllimlər arasında rus dili müəllimləri də var ki, onlar sualların düzgün tərcümə edilmədiyini vurğulayırlar.
Bəs bu müəllimlərin səsləndirdikləri iddialar nə dərəcədə əsaslıdır? Sertifikasiya imtahanında belə halların yer alması qiymətləndirmə meyarlarına uyğundurmu?
Mövzu ilə bağlı Redaktor.az-a Azərbaycan Respublikasının Təhsil İnstitutundan (ARTİ) bildirildi ki, bu məsələ hələ araşdırılır.
