Məlumat verdiyimiz kimi, iyunun 17-dən müəllimlərin sertifikasiya imtahanları başlayıb.
Bəs sertifikasiya imtahanında uğur qazana bilməyib işdən azad edilən müəllimlər təkrardan sertifikasiya imtahanı verə bilirlərmi? Yoxsa həmin müəllimlər yenidən müəllimlərin işə qəbulu (MİQ) imtahanında iştirak etməlidirlər?
Gündəm24.az bildirir ki,mövzu ilə bağlı Redaktor.az-a açıqlamasında elm və təhsil məsələləri üzrə mütəxəssis Elçin Əfəndinin sözlərinə görə, müəllimlərin sertifikasiya imtahanları artıq bir neçə ildir ki, keçirilir və demək olar ki, növbəti il ilk 5 illik proses tamamlanacaq:
“İlk 5 illik proses dediyim ondan ibarətdir ki, ilk dəfə imtahan verənlər artıq 2027-ci ildə yenidən, növbəti 5 illik dövr üçün imtahan verəcəklər. Buna qədər isə demək olar ki, bütün fənlər üzrə sertifikasiya imtahanları ilkin mərhələdə keçirilmiş hesab olunur.
Eyni zamanda, hər bir müəllimə sertifikasiyada iştirak etmək üçün iki dəfə şans verilir. Birinci il əgər o, müvafiq müsabiqə şərtini ödəyə bilmirsə, məsələn, 31 baldan 50 bala qədər nəticə əldə edə bilmirsə və yaxud da 51 baldan 60 bala qədər nəticə göstərmirsə, bu zaman istənilən halda həmin nəticəni əldə edə bilməyənlər müsabiqə şərtini ödəmirlər. Ətraflı qeyd edim ki, 31 baldan 50 bala qədər toplayanların əməkhaqqına 10 faiz, 51 baldan 60 bala qədər nəticə əldə edənlərin isə əməkhaqqına 30 faiz artım tətbiq olunur”.
Müsahibimiz vurğuladı ki, müəllimlər müsabiqə şərtini ödəmədikləri halda onlara növbəti il sertifikasiyada təkrar iştirak etmək imkanı verilir:
“Onlar növbəti sertifikasiyada iştirak etdikləri halda yenə də müsabiqə şərtini ödəməzlərsə, o zaman əmək müqaviləsinə xitam verilir. Bu şəxslər yalnız növbəti dövr üçün yenidən müəllimlərin işə qəbulu imtahanında iştirak edərək prosesə qayıda bilərlər. Yaxud da əmək müqavilələrinə xitam verilir və onlar pedaqoji fəaliyyət göstərə bilmirlər”.
