“Beynəlxalq tədbirlərə ayrılan vəsaitin həcmi azaldılmalıdır. Gələn il Azərbaycanda beynəlxalq tədbirlərin keçirilməsinə 239 milyon manat ayrılıb. Bu məbləğ elmə ayrılan vəsaiti 10 milyon manat üstələyir. Halbuki bu tədbirlərin əksəriyyətinin effektivliyi olduqca aşağıdır. Bir çox hallarda bu, sadəcə hotellərin dəstəklənməsi məqsədini daşıyır”.
Gündəm24.az Globalinfo.az-a istinadən xəbər verir ki, bu fikirləri Milli Məclisin deputatı Qüdrət Həsənquliyev səsləndirib.
O qeyd edib ki, hökumət bu barədə ciddi şəkildə düşünməlidir:
“Nə üçün bu il keçən illərlə müqayisədə turistlərin sayında 1,7 faiz azalma baş verib? Məsələn, Avropadan gələn turistlərin sayı 21,7 faiz azalıb. Qonşu Gürcüstanda isə analoji dövrdə turistlərin sayında 6,6 faiz artım qeydə alınıb. Azərbaycana cəmi 2 milyon 171 min turist gəlmişkən, əhalisi bizdən kiçik olan Gürcüstana 4 milyon 307 min turist səfər edib. Bunun səbəbləri ciddi şəkildə araşdırılmalıdır.
Onun sözlərinə görə, Azərbaycan ABŞ, Avropa və İran vətəndaşları üçün viza rejimini qaldırmağa çalışmalıdır. Eyni zamanda ölkədə genişmiqyaslı araşdırmalar aparılmalıdır. Bu azalma həm də xidmət səviyyəsi, təyyarə biletlərinin baha olması ilə bağlıdır. İctimai iaşə obyektlərində qiymətlər bahadır, ucuz otellər isə demək olar ki, yoxdur”.
Qüdrət Həsənquliyev əlavə edib ki, sərhədlərin açılması məsələsinə yenidən baxılmalıdır. Təhlükəsizlik tədbirləri kifayət qədər yaxşı təşkil olunur və hər hansı risk əsaslı görünmür. İran və Gürcüstandan gələn-gedənlərin hərəkətinə daha geniş imkan yaradılmalıdır.
