Türkiyənin xarici işlər naziri Hakan Fidan ilə İranın xarici işlər naziri Abbas Əraqçi arasında telefon danışığı baş tutub.
Sfera.az xəbər verir ki, bu barədə məlumatı Türkiyə Xarici İşlər Nazirliyi yayıb.
Məlumata görə, telefon danışığı zamanı tərəflər regiondakı son hadisələri və təhlükəsizlik məsələlərini müzakirə ediblər. Hakan Fidan Türkiyənin hava məkanının pozulmasının qəbuledilməz olduğunu bildirib və Ankaranın bu məsələ ilə bağlı bütün lazımi tədbirləri görməyə davam edəcəyini vurğulayıb.
Türkiyəli nazir qeyd edib ki, bütün tərəflər regional təhlükəsizliyi poza biləcək və mülki şəxslər üçün təhlükə yarada biləcək addımlardan çəkinməlidirlər.
Öz növbəsində, İranın xarici işlər naziri Abbas Əraqçi Türkiyə hava məkanına atıldığı bildirilən raketlərin İrandan buraxılmadığını deyib. O, məsələ ilə bağlı hərtərəfli araşdırma aparılacağını da açıqlayıb.
