Xəbər verdiyimiz kimi, İranda baş verən avtomobil qəzasında həlak olan Azərbaycanın Təbrizdəki konsulu Ramil İmranov bu gün Göyçayda dəfn olunub.
Metbuat.az-ın bölgə müxbiri xəbər verir ki, R.İmranov 24 aprel 1977-ci ildə Göyçay rayonu Alxasava kəndində dünyaya göz açıb. O, ailəli idi və onun iki oğul övladı vətənə əmanət qalıb. Mərhumun həyat yoldaşı, İmranova Mətanət Fərhad qızı deyir ki, həyat yoldaşı ilə son danışıqları məhz elə faciə baş verdiyi gün olub:
“Həyat yoldaşım bizə çox bağlı bir insan idi. Hər danışığımızda bizim üçün darıxdığını deyirdi Ramil. Onunla son danışığım elə qəza faciəsi baş verən gün olub. Ondan sonra xəbər tutduq ki, Ramil həlak olub”.
Xatırladaq ki, Ramil İmranov iki gün öncə Culfa-Təbriz avtomagistralının Mərənd qəsəbəsi yaxınlığında xidməti fəaliyyətini həyata keçirərkən idarə etdiyi avtomobillə düşdüyü qəza nəticəsində həlak olub.
