Aparılan təmir işləri yolda qəzaya səbəb oldu.
Ajans.az-ın qaynar xəttinə daxil olan məlumata görə, 24 aprel 2026-cı il tarixində, saat 23:30 radələrində yol-nəqliyyat hadisəsi baş verib. Qəza 20-ci sahə – Badamdar istiqamətində baş verib. Zərərçəkən Əliyev Ələsgər Kia k3 marka 99-HQ-273 nömrə nişanlı avtomobillə qəza törədib.
Qəzanın baş verməsinə birbaşa səbəb yolda təmir işlərini həyata keçirən qurum tərəfindən Azərbaycan Respublikasının “Yol hərəkəti haqqında” Qanununun 11-ci maddəsinin tələblərinin pozulmasıdır. Zərərçəkən Ələsgər Əliyev bildirib ki, hadisə baş verən yolda təmir sahəsindən öncə heç bir xəbərdaredici nişan, gecə vaxtı görünən işıqqaytarıcı element və ya xüsusi maneə göstəricisi quraşdırılmaması səbəbilə baş verib.
O qeyd edib ki, yolda müəyyən edilmiş sürət həddi (60 km/saat) ilə hərəkət etməsinə baxmayaraq, heç bir xəbərdarlıq olmadığına görə maneəni vaxtında görə bilməyib. Qəza nəticəsində avtomobilin ön və alt hissəsi tamamilə yararsız hala düşüb. Ələsgər Əliyev iddia edir ki, ona külli miqdarda ziyan dəyib. Həmçinin sürücünün özünə də fiziki cəhətdən zərər dəyib. Hadisə anı və yolun nişansız olması faktı avtomobildəki videoregistrator vasitəsilə tam qeydə alınmışdır.
Mövzu ilə bağlı AAYDA ilə əlaqə saxladıq. Agentlikdən cavab olaraq bildirildi ki, məsələnin araşdırılması üçün vətəndaş agentliyə rəsmi olaraq müraciət etsin.
