Çinin Sindao şəhərində keçirilən cüdo üzrə Qran-pri turnirində Azərbaycan idmançıları növbəti uğura imza atıblar.
Gündəm24.az xəbər verir ki, yarışın növbəti günündə Azərbaycanın daha iki cüdoçusu fəxri kürsüyə qalxmağı bacarıb.
Turnirdə 81 kq çəki dərəcəsində mübarizə aparan idmançılarımızdan Zelim Tçkayev bütün rəqiblərini məğlub edərək qızıl medala yiyələnib. Eyni çəkidə çıxış edən Olimpiya çempionumuz Hidayət Heydərov isə yarışı bürünc mükafatla başa vurub.
Qeyd edək ki, turnirin ilk günündə digər cüdoçumuz Əhməd Yusifov (60 kq) da komandamızın aktivinə bürünc medal yazdırmağı bacarmışdı..
Xatırladaq ki, H. Heydərov son illərdə çəki problemi səbəbindən bəzi turnirlərdən kənarda qaldığı üçün idman ictimaiyyəti tərəfindən tənqid olunurdu. Yeni çəki dərəcəsində bürünc medal qazanan cüdoçumuz tənqidlərə sosial şəbəkə hesabında cavab verib. O, fəxri kürsüdəki fotosunu “Yenə kürsüdəyəm, sizi çox-çox sevirəm” qeydi ilə paylaşıb.
