Ukrayna Prezidenti Vladimir Zelenski ABŞ Prezidenti Donald Trampla telefon danışığından sonra Avropa liderləri ilə mövqelərini koordinasiya etdiyini açıqlayıb.

Gündəm24.az xəbər verir ki, Zelenski bəyanatında davamlı sülhün əldə olunmasının vacibliyini vurğulayıb:

“Sülh real və uzunmüddətli olmalıdır, Rusiyanın növbəti işğalına qədər sadəcə fasiləyə çevrilməməlidir. Döyüş meydanında və havada, eləcə də liman infrastrukturumuza qarşı atəşkəsə nail olunmalıdır. Bütün ukraynalı əsirlər – hərbçilər və mülki şəxslər azad edilməli, Rusiya tərəfindən oğurlanan uşaqlar geri qaytarılmalıdır. Minlərlə insanımız hələ də əsirlikdədir və onlar evə dönməlidirlər”, – deyə o bildirib.

Zelenski əlavə edib ki, Trampa açıq şəkildə bildirib:

"Əgər Putin üçtərəfli görüşə razılaşmazsa və ya Rusiyanın müharibəni ədalətli şəkildə bitirməkdən yayınması müşahidə olunarsa, sanksiyalar gücləndirilməlidir."

O, həmçinin qeyd edib ki, Ukraynanın təhlükəsizliyi Avropa və ABŞ-ın birgə zəmanəti ilə təmin olunmalıdır:

“Ukrayna üçün vacib olan bütün məsələlər Ukraynanın iştirakı ilə müzakirə olunmalıdır. Xüsusən də ərazi məsələləri Ukraynasız həll edilə bilməz”, – deyə Zelenski vurğulayıb.

Səmra İSMAYIL,
Gündəm24.az

Oxunub: 8