Rusiyada fəaliyyət göstərən azərbaycanlı milyarder Fərhad Əhmədov ətrafında baş verən hadisələr getdikcə dolaşıq və çoxqatlı qalmaqala çevrilir. Onu eyni anda həm dələduzluqların qurbanı, həm də şübhəli məhkəmə qərarları ilə borclu kimi təqdim edirlər.

Milyarderin öz açıqlamaları, məhkəmə sənədləri və müstəqil ekspertizaların nəticələri göstərir ki, Əhmədov sistemli aldadılma və reydçi təzyiqlərlə üz-üzədir. Nəticədə onun cəmi 5 milyon manatlıq iddia olunan borcuna görə təxminən 100 milyon manatlıq əmlakı əlindən alınmaq təhlükəsi yaranıb.

GUNDEM24.az xəbər verir ki, Fərhad Əhmədov tanınmış ictimai fiqurdur. O, Azərbaycana yüz milyonlarla dollar sərmayə yatırıb, zavodlar, aqrokomplekslər qurub, minlərlə iş yeri yaradıb. Amma paradoks ondadır ki, məhz doğma vətənində iş adamı ard-arda müxtəlif fırıldaqçılıq sxemlərinin hədəfinə çevrilib. Onun etibar etdiyi podratçılar və menecerlər nəticədə milyonlarla zərərə səbəb olublar.

İlk siqnallar bir neçə il əvvəl gəldi. İtaliyanın Paghera Green Service Societa Agricola S.R.L. şirkəti Əhmədovun Bilgə qəsəbəsindəki iqamətgahının abadlaşdırılması ilə bağlı müqaviləni pozdu, işləri yarımçıq və keyfiyyətsiz gördü. Məhkəmələr həmin vaxt iş adamının tərəfində qərar çıxarsa da, o, milyonlarla dollar itkiyə məruz qaldı.

Daha sonra isə Armadil Group şirkətinin iştirakı ilə daha böyük qalmaqal başladı. Şirkətin təsisçisi Fəxrəddin Bağırovun cəmi 100 manat nizamnamə kapitalı olsa da, Əhmədovun müxtəlif daşınmaz əmlaklarının təmiri üzrə on milyonlarla dəyərində sifarişlər almışdı. Smeta sənədlərində Avropa istehsalı premium materiallar göstərilsə də, ekspertiza faktiki olaraq ucuz və keyfiyyətsiz materiallardan istifadə olunduğunu üzə çıxardı. Zərərin məbləği təxminən 5 milyon manat oldu.

Əhmədovun sözlərinə görə, prosesdə onun etibar etdiyi nümayəndə Nail Şahverdiyev də rol oynayıb. İş adamı Armadil Group xidmətlərinin ödənişi üçün müxtəlif hesablar üzərindən 10 milyon manata yaxın vəsait göndərsə də, bu ödənişlərin sənədləri təqdim olunmadı. Nəticədə 2024-cü ilin iyulunda Bakı Apellyasiya Məhkəməsi Əhmədovun şirkətini 2,9 milyon dolları “Armadil Group”a ödəməyə məcbur etdi.

Bundan sonrakı mərhələdə məhkəmə icraçıları tərəfindən qanunsuzluqlar baş verdi. Əhmədovun şirkətinə icra işinin başlandığı barədə rəsmi bildiriş göndərilmədi, vəkillərin iş materiallarına çıxışına imkan verilmədi, müsadirə olunan əmlaklar isə hərracsız və bazar dəyərindən qat-qat ucuz qiymətlərlə qarşı tərəfə ötürüldü. Məsələn, İçərişəhərdəki daşınmaz əmlak 2,5 milyon manata qiymətləndirilsə də, müstəqil ekspertlər onun real dəyərinin 20 milyon manatdan çox olduğunu təsdiqləyiblər.

Beləliklə, 5 milyonluq borca görə iş adamının 100 milyon manatlıq əmlakı əlindən alınmaq təhlükəsi yaranıb. Hüquqşünaslar bu qədər qeyri-mütənasib qərarların öz-özlüyündə təzyiq və sui-istifadə əlaməti olduğunu bildirirlər.

Əhmədov həmçinin xatırladır ki, Azərbaycandakı biznes fəaliyyətində oxşar hallar illərdir davam edir. İsmayıllıda yerləşən aqrokompleksinə rəhbərlik edən şəxslərin təsərrüfatı dağıtdığını, hovuzlardan 60 min nərə balığının yoxa çıxdığını, yüzlərlə hektarlıq üzüm bağlarının və quşçuluq fermasının sıradan çıxarıldığını qeyd edir.

Hadisələrin ümumi mənzərəsi bir sualı gündəmə gətirir: söhbət yalnız ayrı-ayrı podratçı və menecerlərin dələduzluqlarından gedir, yoxsa iş adamının ölkədən sıxışdırılması məqsədilə məqsədyönlü kampaniya aparılır? Təcrübəli hüquqşünasların fikrincə, dövlət orqanlarının şikayətləri cavabsız qoyması və məhkəmə icraçılarının sərgilədiyi ifrat sərtlik ikinci versiyanı gücləndirir.

Fərhad Əhmədov isə açıq şəkildə bildirir: sərmayələri və sosial layihələri ona nə qazanc, nə də tanınma gətirib – əksinə, illərlə davam edən fırıldaq, mənimsəmə və reydçi təzyiqlərlə nəticələnib. Onun sözləri ittiham kimi səslənir: “Bütün şikayətlərim cavabsız qaldı”.

Hazırda iş Ali instansiyalarda araşdırılır, Əhmədovun vəkilləri icraçılar barəsində iddia qaldırıblar. Lakin bu dava artıq təkcə təsərrüfat mübahisəsi yox, həm də ölkənin investisiya mühitinə münasibətin göstəricisinə çevrilib.

Əli Səlimov,
GUNDEM24.az

Oxunub: 37