Serbiyada cümə gününə keçən gecə baş verən iğtişaşlar zamanı 42 polis əməkdaşı xəsarət alıb, 37 nəfər etirazçı saxlanılıb. Bu barədə Serbiyanın vitse-premyeri və daxili işlər naziri İvitsa Daçiç məlumat verib.

Gündəm24.az xəbər verir ki, etirazçılar yenidən Serb Tərəqqipərvər Partiyasının (SPP) ofislərinə hücum ediblər. Novi-Sad şəhərində aksiya iştirakçıları partiyanın qərargahına girərək iki ofisin pəncərələrini sındırıb, binadan mebelləri çıxarıblar. Paytaxt Belqradda isə hökumət əleyhdarları hüquq-mühafizə orqanlarını fişənglərlə atəşə tutublar. Yerli KİV-in məlumatına görə, paytaxtın küçələrində xaos hökm sürüb.

İvitsa Daçiç Novi-Saddakı nümayişçilərə qarşı polis əməkdaşlarının sərt tədbirlər görməməsini tənqid edib. Prezident Aleksandr Vuçiç isə bildirib ki, polis islahat ediləcək, çünki “dövlət öz işini görməlidir”.

Səmra İSMAYIL

Oxunub: 20