İranın ali lideri Əli Xameneinin hərbi müşaviri Rəhim Səfəvi Yaxın Şərqdə gərginliyi artıracaq sərt bəyanatla çıxış edib. Onun sözlərinə görə, regionda vəziyyət hələ də “atəşkəs” kimi deyil, məhz “müharibə vəziyyəti” kimi qiymətləndirilməlidir.

Gündəm24.az xəbər verir ki, Səfəvi çıxışında İran ilə ABŞ və ya İsrail arasında hər hansı protokol, razılaşma və ya hüquqi öhdəliklərin mövcud olmadığını vurğulayıb. O, vəziyyətin son dərəcə həssas olduğunu bildirərək əlavə edib: “Mən düşünürəm ki, istənilən an yeni müharibə başlaya bilər. Ola bilsin, bu müharibədən sonra artıq başqa müharibələr olmasın.”

Səfəvinin bu açıqlamaları beynəlxalq arenada ciddi rezonans doğurub. Analitiklər hesab edirlər ki, Tehranın bu mövqeyi bölgədəki gərginliyi daha da alovlandıra və ABŞ-İsrail-İran münasibətlərində yeni qarşıdurmalar üçün zəmin yarada bilər.

İran rəsmisinin sözləri həm də son aylarda Yaxın Şərqdə artan hərbi toqquşmalar fonunda diqqət çəkir. Ekspertlər ehtimal edirlər ki, Tehranın sərt mövqeyi yaxın gələcəkdə regionda yeni hərbi əməliyyatların başlanması riskini yüksəldir.

Səmra İsmayıl,
Gündəm24

Oxunub: 6