ABŞ prezidenti Donald Tramp və Ukrayna prezidenti Volodimir Zelenski Ağ Evdə keçirilən görüşdə müharibənin mümkün sonu, təhlükəsizlik zəmanətləri və gələcək planlarla bağlı mühüm açıqlamalar veriblər. Görüşdə həmçinin Avropa liderləri də iştirak edib.

Gündəm24.az xəbər verir ki, Tramp müzakirələrin yekununda Ukraynadakı müharibənin başa çatdırılması üçün “məntiqli şansların” olduğunu bildirib. O vurğulayıb ki, həm Rusiya prezidenti Vladimir Putin, həm də Zelenski müharibənin sona çatmasını istəyir. Tramp həmçinin Avropa liderlərinin də Ukraynada sülhün bərqərar olmasını arzuladığını deyib. O, ABŞ-ın Ukraynaya “çox yaxşı müdafiə” təmin edəcəyini vəd edib, lakin bunun NATO-nun təhlükəsizlik zəmanətləri kimi qiymətləndirilib-qiymətləndirilməyəcəyini dəqiq deməyib. Tramp müharibənin mütləq bitəcəyini, lakin bunun vaxtını hələlik təxmin etməyin mümkün olmadığını qeyd edib. Onun sözlərinə görə, görüş son deyil, qarşıdakı mərhələlərdə davamlı və dayanıqlı sülhün əldə olunması əsas məqsəd olacaq. Tramp əlavə edib ki, Ukraynaya veriləcək Amerika silahlarının xərclərini NATO ödəyəcək.

Zelenski isə jurnalistlərin suallarına cavabında müharibənin gedişində ərazi güzəştlərinə gedib-getməyəcəyi barədə konkret fikir bildirməyib. Ukraynada seçkilərin keçirilməsi ilə bağlı suala cavabında isə prezident bunun üçün “təhlükəsizlik şəraitinin təmin edilməsinin vacibliyini” vurğulayıb. O həmçinin ABŞ silahlarının alınması ilə bağlı problemlərin olduğunu etiraf edib.

Səmra İsmayıl,
Gündəm24.az

Oxunub: 10