Avqustun 18-nə keçən gecə Odessanın səması yenidən partlayışların işığı ilə işıqlandı. Rusiyanın “Şahed” tipli pilotsuz uçuş aparatları liman şəhərinin strateji obyektlərinə zərbə endirib. Hədəflər arasında Azərbaycan Dövlət Neft Şirkətinə (SOCAR) məxsus neft bazası da olub. Ümumi həcmi 16 min kubmetrdən çox olan 17 rezervuar qısa zamanda dağıntılara çevrilib.

Bu, son bir ayda SOCAR-ın Ukraynadakı aktivlərinə ikinci hücumdur. İlk hücum avqustun 8-də baş vermiş, həmin vaxt da Rusiyanın pilotsuz aparatları eyni neft bazasını qismən dağıtmışdı. Bu təkrarlanan hücumlar Moskvanın Bakının Kiyevlə artan enerji əməkdaşlığından ciddi narazılığını nümayiş etdirən açıq mesaj kimi qiymətləndirilir.

Gündəm24.az xəbər verir ki, SOCAR-ın obyektlərinə zərbələr, əslində, Rusiyanın Bakı üzərində siyasi təzyiq vasitəsinə çevrilib. Hücumların məhz Azərbaycanla Ukrayna arasında qaz təchizatına dair ilk müqavilənin imzalanmasından və tədarüklərin başlamasından sonra baş verməsi təsadüfi deyil. Beləliklə, Moskva göstərir ki, Bakının Kiyevlə enerji əməkdaşlığına davam etməsi yeni hücumlarla nəticələnə bilər.

Xatırladaq ki, iyulun sonunda “Naftoqaz” və SOCAR arasında qaz təchizatına dair müqavilə imzalanmışdı. İlk tədarük Transbalkan dəhlizi vasitəsilə Bolqarıstan və Rumıniya üzərindən Ukraynaya çatdırılmışdı. Bu, Ukraynanın Rusiya qazından qismən də olsa imtina etməsi baxımından mühüm addım idi.

Moskvanın cavabı isə gecikmədi — əvvəlcə Odessada qazpaylayıcı stansiya vuruldu, ardınca SOCAR-ın neft bazası hədəfə alındı.

Ukrayna Prezidenti Volodimir Zelenski bu hücumları “Azərbaycanla münasibətlərə və Ukraynanın enerji müstəqilliyinə yönəlmiş birbaşa zərbə” adlandırdı. Xarici işlər naziri Andrey Sibiga isə bu hücumları “Rusiyanın Azərbaycana qarşı məqsədyönlü fəaliyyəti” kimi qiymətləndirərək diplomatik və hüquqi cavabın vacibliyini vurğuladı.

Bakı və Kiyev isə eyni mövqedən çıxış edir: SOCAR obyektlərinə hücumlar enerji əməkdaşlığını dayandırmayacaq, əksinə, bu əməkdaşlığın vacibliyini bir daha ortaya qoyur. Azərbaycanın qərarı qarşısında isə ciddi seçim dayanır: Rusiyanın təzyiq orbitində qalmaq, yoxsa Qərblə daha sıx enerji əməkdaşlığına addım atmaq.

Səmra İSMAYIL,
Gündəm24.az

Oxunub: 14