İsrailin “Haaretz” qəzeti “Qatargate” adlanan qalmaqalla bağlı araşdırma dərc edib.

Gündəm24.az haqqın-az istinadən xəbər verir ki, nəşrin yazdığına görə, məsələ təkcə korrupsiya faktlarının ifşası deyil, həm də İsrailin siyasi sisteminə qarşı ciddi ittihamdır.

Məlumata əsasən, 2022–2024-cü illərdə Qətər baş nazir Benyamin Netanyahunun yaxın ətrafına daxil olan media məsləhətçilərinə və keçmiş kəşfiyyatçıya təxminən 10 milyon dollar ötürüb.

Pul “Project Lighthouse” adlı xüsusi PR kampaniyası vasitəsilə yönləndirilib. Layihənin məqsədi Qətəri “sülh gücü” kimi təqdim etmək olub.

Bu sxemdə baş nazirin əsas məsləhətçiləri, “Likud”un media strateqi İsrael Eynhorn, onun müttəfiqi Yonatan Uriç və Netanyahunun mətbuat katibi Eli Feldstein əsas fiqurlar kimi göstərilir. Qeyd olunur ki, onlar müharibə başlayandan sonra da Qətərdən müntəzəm ödənişlər alıblar.

Araşdırma vurğulayır ki, Qətərin pulu İsraildə adi reklam kampaniyası üçün deyil, məhz Netanyahunun yanında olanların “səsi və susqunluğu” üçün xərclənib. Məsələn, hər yazının dərcinə görə ödənilən 15–20 min dollar əmirliyə İsrail informasiya məkanında təsir imkanı yaradıb.

İsrail müxalifəti hesab edir ki, “Qatargate” Netanyahunun milli maraqları satmağa razılıq verməsinin bariz nümunəsidir. ABŞ Demokratları isə bu faktı Tramp–Netanyahu yaxınlığını tənqid etmək üçün əsas arqumentə çeviriblər. Onların fikrincə, Qətər Netanyahunun ətrafına bu qədər asan nüfuz edibsə, eyni kanallardan ABŞ siyasətinə təsir göstərmək üçün də istifadə edə bilər.

Nəticədə, qalmaqal bütün tərəflərə zərbə vurub:

İsrail hökumətinin imicinə ağır zərbə dəyib, daxili gərginliklər daha da dərinləşib;

Qətərin bahalı kampaniyası uğursuzluqla nəticələnib;

Netanyahu isə müxalifət və beynəlxalq tərəfdaşlar qarşısında daha həssas vəziyyətə düşüb.

Müxalifətin iddiasına görə, “Qətər hər yazıya görə 15–20 min dollar ödəməklə medianı deyil, Netanyahunun arxasındakı susqunluğu satın alırdı”.

Amerika Demokratlarının sözlərinə görə isə: “Əgər Qətər 10 milyon dollara Netanyahunun yaxın çevrəsini ələ ala bilibsə, deməli, sistemin özü təhlükə altındadır”.


Gündəm24.az

Oxunub: 9